रिक्षाचालकांनी पुकारला अघोषित बंद

रिक्षाचालकांचा अघोषित बंद
कल्याण, ता. १९ (बातमीदार) : काटेमानिवली ते चिंचपाडा रस्त्याची सध्या खूपच दयनीय अवस्था झाली आहे. अरुंद असलेल्या या मार्गावर जागोजागी खड्डे पडलेले आहेत. रस्त्याच्या दुरवस्थेला वैतागून शनिवारी (ता. १९) सकाळी रिक्षाचालकांनी एकत्रितपणे अघोषित बंद पुकारत आंदोलन केले. यानंतर रिक्षाचालकांनी महापालिका प्रशासनाच्या कारभारावर नाराजी व्यक्त केली. तसेच रस्त्याच्या डागडुजीची मागणी केली. यासंदर्भात प्रभाग क्षेत्र कार्यालयाला निवेदन दिल्यानंतर संप मागे घेण्यात आला.

काटेमानिवली ते चिंचपाडा मार्गावर अनेक रहिवासी संकुले, शाळा तसेच महाविद्यालयेदेखील आहे. दिवसभरात शेकडो वाहनांची वाहतूक येथील अरुंद मार्गाहून असते. याच मार्गावर खडेगोळवली तसेच आमराईसाठी जाणारा जोडरस्तादेखील आहे. जागोजागी पडलेल्या खड्ड्यांचा नाहक त्रास येथील स्थानिक नागरिक, विद्यार्थी तसेच वाहनचालकांना मोठ्या प्रमाणावर होतो. पावसाच्या पाण्याने खड्डे भरल्यामुळे खड्ड्यांच्या खोलीचा अंदाज येत नाही. यामुळे छोटे-मोठे अपघात होत असतात. यात वाहनांचे नुकसान होत असल्याने अनेक रिक्षाचालकांना आर्थिक फटका बसतो.

रिक्षाचालकांनी पुकारलेल्या अघोषित बंदबाबत सुमेध हुमणे या प्रवाशाने सांगितले, की रिक्षा बंद केल्याने चिंचपाडा येथील नागरिकांची मोठ्या प्रमाणावर गैरसोय झाली होती. नोकरदारांना कामावर जाण्यासाठी तर विद्यार्थ्यांना शाळा-महाविद्यालयात पोहोचण्यासाठी उशीर झाला. त्यामुळे या रिक्षाचालकांची समजूत काढून त्यांच्या वतीने आम्ही ‘५-ड’ प्रभाग क्षेत्र कार्यालयाला रस्त्याच्या दुरुस्तीसाठीचे निवेदन आम्ही दिले. त्यामुळे लवकरच रस्त्याची दुरुस्ती होईल, अशी आम्हाला अपेक्षा आहे.