चड्डी बनियान टोळीच्या दोघांना सक्त मजुरी

चड्डी-बनियान टोळीच्या दोघांना सक्त मजुरी
दोघे अजूनही फरार; कल्याण-डोंबिवली परिसरात घरफोडीतील आरोपी
चड्डी बनियान टोळीच्या दुकलीला पाच वर्षांची सक्त मजुरी
ठाणे शहर, ता. १९ (बातमीदार) : अंगाला तेल लावून घरफोड्या करणाऱ्या चड्डी-बनियान टोळीतील दुकलीला ठाणे न्यायालयाने पाच वर्षांच्या सश्रम कारावासाची शिक्षा सुनावली आहे. या गुन्ह्यात टोळीकडून चोरीचे दागिने विकत घेणाऱ्या सराफालाही न्यायालयाने २५ दिवसांच्या कारावासाची शिक्षा सुनावली आहे. कल्याण-डोंबिवली परिसरात ही टोळी चोऱ्या, घोरपडी करीत होती. या चोरीप्रकरणी पोलिसांना त्यांना ताब्यात घेऊन गुन्हा नोंद केला होता.
सुमारे १० वर्षांपूर्वी कल्याण-डोंबिवली परिसरात रात्रीच्या वेळी चड्डी-बनियान घालणाऱ्या टोळीने दहशत पसरवली होती. टोळीचे सदस्य अंगात चड्डी-बनियान घालून आणि अंगाला तेल लावून चोऱ्या, घरफोड्या करीत ही टोळी फिरत होती. ४ मार्च २०१७ रोजी ही टोळी मानपाडा पोलिस ठाण्याच्या हद्दीत चोरी करताना त्यातील एकाला पकडले होते.
------------------------------------
अंगाला तेल लावून चोरी
अंगाला तेल लावून चोरी करण्याचा त्यांचा पॅटर्न असल्यामुळे इतर तिघे जण पोलिसांच्या हातून निसटले होते. एकाला अटक केल्यानंतर आणखीन एकाचा शोध घेण्यात आला होता. या टोळीची दहशत आणि गुन्हे करण्याचा पॅटर्न पाहता पोलिसांनी त्यांच्यावर मकोकाअंतर्गत कारवाई केली होती.
---------------------------
सराफाला २५ दिवसांची कैद
टोळीवर घरफोडी आणि चोरीच्या गुन्ह्यांप्रकरणी बुधवारी (ता. १५) जिल्हा सत्र न्यायालयात अंतिम सुनावणी झाली. या वेळी सरकारी वकील संजय मोरे यांनी युक्तिवाद केला. त्यानंतर मकोका न्यायालयाचे विशेष न्यायधीश व्ही. जी. मोहिते यांनी राहुल शिंदे आणि दत्ता शिंदे दोघांना चोरीच्या गुन्ह्यात पाच वर्षे सक्त मजुरी आणि हजार रुपये दंडाची शिक्षा सुनावण्यात आली. आरोपींकडून चोरीचे दागिने विकत घेणाऱ्या अमित बागरेचा याला २५ दिवस कैदेची शिक्षा सुनावली. या गुन्ह्यातील दोन आरोपी अद्याप सापडून आलेले नाहीत.