लघु नाट्यगृहाला जयवंत दळवींचे नाव

घाटकोपर (बातमीदार)ः बोरिवलीतील प्रबोधनकार ठाकरे नाट्यगृहातील मिनी थिएटरला नाटककार जयवंत दळवी लघु नाट्यगृह, असे नाव देण्यात आले आहे. पद्मश्री मधु मंगेश कर्णिक यांच्या उपस्थितीत हा सोहळा पार पडला. २००१ मध्ये, प्रबोधनकार ठाकरे नाट्यगृहाच्या उद्घाटनापूर्वीच, महाराष्ट्र मानव सेवा संघाचे अध्यक्ष डॉ. हरीश बी.शेट्टी यांच्या नेतृत्वाखाली मोठ्या संख्येने स्थानिक लोकांनी छोट्या नाट्यगृहाला जयवंत दळवी यांचे नाव देण्याची मागणी केली होती. परंतु, काही कारणांनी हे होऊ शकले नाही. अखेर कोकण मराठी साहित्य परिषद, मुंबई जिल्हा ग्रंथली आणि बृहन्मुंबई पालिका यांच्या सहकार्याने, या छोट्या थिएटरला नाटककार जयवंत दळवी लघु नाट्यगृह, असे नाव देण्यात आले आहे.