संकेतस्थळामुळे नागरिकांचे हाल

महापालिकेच्या संकेतस्थळावर तांत्रिक त्रुटी
अडथळ्यांमुळे नागिकांचा गोंधळ
टिटवाळा, ता. १९ (वार्ताहर) : कल्याण-डोंबिवली महापालिकेच्या डिजिटल व्यवस्थेचा अक्षरश: बोजवारा उडाला आहे. तांत्रिक अडचणींमुळे संकेतस्थळ बंद पडत असल्याने नागरिकांना नाहक त्रास सहन करावा लागत आहे. नागरिकांना जलद, पारदर्शक आणि सुलभ सेवा मिळाव्यात, या हेतूने महापालिकेने तयार केलेले अधिकृत संकेतस्थळ सध्या नागरिकांच्या डोकेदुखीचे कारण ठरले आहे.

संकेतस्थळाचा वेग संथ असल्याने अनेकांना केवळ लॉगिन करण्यासाठी अडचणी येत आहेत. तसेच यामुळे नागरिकांचा वेळ जात आहे. तांत्रिक अडचणी, चुकीची माहिती यामुळे नागरिक त्रस्त झाले आहेत. विशेष म्हणजे, नागरिकांसाठी अत्यंत आवश्यक असलेल्या संपर्क क्रमांकांतही गंभीर त्रुटी आहेत. मुख्य पृष्ठावर चक्क शहर अभियंता अनिता परदेशी यांचा दूरध्वनी क्रमांक सातच आकड्यांमध्ये ‘०२५१२२०६१’ नमूद केला गेला असून तो अपूर्ण आहे. अशा अपूर्ण माहितीमुळे संबंधित अधिकाऱ्यांपर्यंत पोहोचणे अडचणीचे आणि त्रासदायक ठरत आहे.

संकेतस्थळावर नमूद आकडेवारीनुसार सुमारे २२ लाखांहून अधिक अभ्यागत आणि एक लाख नोंदणीकृत वापरकर्ते आहेत; मात्र जेव्हा प्रत्यक्ष सेवा मिळवण्याची वेळ येते. तेव्हा नागरिकांच्या पदरी निराशा येते. ‘डिजिटल इंडिया’चे गोड गाणे गाणाऱ्या यंत्रणेला सुधारणा करायची इच्छा आहे की नाही, हा खरा प्रश्न असल्याचा प्रतिक्रिया नागरिकांनी व्यक्त केल्या आहेत.