जव्हारमध्ये गॅस्ट्रोने दोन जणांचा मृत्यू

जव्हार, ता. १९ (बातमीदार) : नांदगाव ग्रामपंचायतीमधील राजेवाडी पाड्यात गॅस्ट्रोची साथ आली आहे. या परिसरात गॅस्ट्रोमुळे दोन व्यक्तींचा मृत्यू झाला आहे. या घटनेमुळे परिसरात भीतीचे वातावरण असून आजही तब्बल १४ रुग्ण उपचार घेत असून त्यांची प्रकृती सध्या स्थिर असल्याचे आरोग्य विभागाकडून सांगण्यात येत आहे.

पावसाळा सुरू झाला, की विहिरींवर अवलंबून असलेल्या अनेक गावांत दूषित पाण्यामुळे साथीचे रोग पसरतात. माॅन्सूनपूर्व तयारीच्या निमित्ताने आरोग्य विभाग नेमकी कोणती उपाययोजना करते, हा संशोधनाचा भाग आहे, असे नागरिक सांगतात. दरम्यान, सध्या ही साथ आटोक्यात आणण्यासाठी जव्हार आरोग्य विभाग प्रयत्नशील आहे; मात्र या साथीमुळे चिंतू गोंड (५५) आणि अनिता गांगड (४५) यांना आपला जीव गमवावा लागल्याने हळहळ व्यक्त होत आहे.

दोन दिवसांपूर्वी नागरिकांना अगोदर जुलाब, उलटी व्हायला लागली; मात्र याची तीव्रता वाढत जाऊन अनेक नागरिकांना उपचारासाठी जव्हार कुटीर रुग्णालय, नांदगाव प्राथमिक आरोग्य केंद्र याठिकाणी दाखल करण्यात आले. यामधील एकाचा जव्हार रुग्णालयात, तर एकाचा राहत्या घरी मृत्यू झाल्याची माहिती समोर येत आहे.

गेल्या दोन वर्षांपासून जव्हार तालुक्यात जलजीवन योजनेची कामे चालू आहेत. ते अद्याप पूर्ण झाली नाहीत; अन्यथा आज नळाला शुद्ध पाणी मिळाले असते आणि ही घटना टळली असती.
- एकनाथ दरोडा, अध्यक्ष, सरपंच संघटना