शिखर युथ फाउंडेशनचा विद्यार्थ्यांसाठी मदतीचा हात

मनोर (बातमीदार) : पालघर तालुक्यातील ग्रामीण आणि आदिवासी बहुल भागातील विद्यार्थ्यांना शिखर यूथ फाउंडेशनच्या वतीने शैक्षणिक साहित्य उपलब्ध करून देण्यात आले. नागझरी शाळा आणि नानिवली आश्रमशाळेत आयोजित कार्यक्रमात शैक्षणिक साहित्याचे वाटप करण्यात आले. परिसरातील २३ जिल्हा परिषद शाळांमधील एक हजार २३ विद्यार्थ्यांना शैक्षणिक साहित्यवाटप करण्यात आले. विद्यार्थ्यांना वह्या, पेन, पेन्सिल आणि रोटरी क्लबच्या सहकार्याने शालेय दप्तरे उपलब्ध करण्यात आल्या. ग्रामीण भागातील विद्यार्थ्यांना शिकण्यासाठी योग्य वातावरण, तसेच शिक्षणात रस निर्माण करण्याचा उद्देश असल्याचे मत शिखर यूथ फाउंडेशनच्या प्रतिनिधींनी व्यक्त केले.