घणसोली नागरी आरोग्य केंद्राचा हिवताप विरोधात एल्गार

घणसोली नागरी आरोग्य केंद्राचा हिवतापाविरोधात एल्गार
जूनपासून पालिकेच्या माध्यमातून १२ ठिकाणी जनजागृती
तुर्भे, ता. १९ (बातमीदार) ः पावसाळ्यात डासांपासून हिवताप आजाराची लागण मोठ्या प्रमाणात होते. त्यामुळे संबंधित आजाराला प्रतिबंधित करण्यासाठी नवी मुंबई महापालिकेच्या घणसोली नागरी आरोग्य केंद्राच्या माध्यमातून हिवतापाविरोधात एल्गार पुकारण्यात आला आहे. त्यासाठी नागरी आरोग्य केंद्राने घणसोली गाव व परिसरामध्ये आतापर्यंत १२ ठिकाणी जनजागृती कम्‍प लावून नागरिकांना सतर्क केले आहे. तसेच परिसरातील नागरिकांची हिवतापासंबंधी रक्त तपासणीदेखील केली जात आहे.
नवी मुंबई महापालिकेचे आयुक्त डॉ. कैलास शिंदे यांच्या आदेशानुसार आणि पालिकेचे मुख्य वैद्यकीय अधिकारी डॉ. प्रशांत जवादे यांच्या मार्गदर्शनाखाली घणसोली गाव नागरी आरोग्य केंद्राच्या वैद्यकीय अधिकारी डॉ. वैशाली म्हात्रे यांच्या माध्यमातून घणसोली गाव आणि परिसरात हिवताप विरोधी कम्प सुरू केले आहेत. यामुळे नागरिकांना पावसाळ्यातील आजारांची माहिती मिळत आहे. तसेच डासांपासून मुक्ती कशी मिळवायची याचीही विस्तृत माहिती कॅम्पच्या माध्यमातून देण्यात येत आहे. पावसाळा सुरू झाल्यानंतर मलेरिया, डेंगीसारख्या डासांची उत्पत्ती होत असते. मलेरिया जातीचा डास खराब पाण्यावर उत्पन्न होतो, तर डेंगी जातीचा डास स्वच्छ पाण्यावर उत्पादित होतो. त्यांचे प्रजनन होऊ नये, यासाठी काय करावे, याबाबत या कम्पच्या माध्यमातून नागरिकांना माहिती देण्यात येत आहे. यासाठी विविध साहित्याचादेखील वापर करण्यात येत आहे. यामुळे नागरिकांना पायाभूत डासविरोधी माहिती मिळत आहे. यामुळे हिवतापाने त्रस्त रुग्णांची संख्यादेखील कमी झाल्याचे सांगण्यात येत आहे.
..............
कोट
या कॅम्पमध्ये डासांची उत्पत्ती कशी होते याची पूर्णपणे माहिती दिली जाते. तसेच दक्षता कशी घ्यावी, हेदेखील सांगण्यात येते. पालिकेचे कर्मचारी जनजागृती मोहिमेत पूर्णत: झोकून देऊन काम करीत असल्याचे वैद्यकीय अधिकारी डॉ. वैशाली म्‍हात्रे यांनी सांगितले.