तरुणाच्या अंगावर पेट्रोल ओतून जाळून देण्याचा प्रयत्न

मस्करीत अंगावर पेट्रोल ओतून जाळण्याचा प्रयत्न
उल्हासनगर, ता. १९ (बातमीदार) : मौजमस्तीच्या नादात एका तरुणाच्या अंगावर पेट्रोल ओतून त्याला जाळण्याचा प्रयत्न केल्याची घटना शुक्रवारी (ता. १८) उल्हासनगरातील मध्यवर्ती पोलिस ठाण्याच्या हद्दीत घडली. या घटनेत गंभीर जखमी झालेल्या तरुणावर रुग्णालयात उपचार सुरू असून याप्रकरणी पोलिस ठाण्यात गुन्हा नोंद करण्याची प्रक्रिया सुरू आहे.
ऋषी गुप्ता असे जखमी झालेल्या तरुणाचे नाव आहे. ऋषी हा शुक्रवारी रात्री मद्यपान करण्यासाठी शास्त्रीनगर येथील एटीपी शाळेजवळ बसला होता. या वेळी त्याच्या परिचयाचा रोहन यादव याने मस्करीच्या नादात ऋषीच्या अंगावर पेट्रोल ओतून आग लावली. त्यात ऋषी गंभीर जखमी झाला. त्याच्यावर उल्हासनगरच्या शासकीय रुग्णालयात उपचार सुरू आहेत. पेट्रोल ओतून जाळून टाकण्याचा प्रयत्न करणारा रोहन नशेत होता. त्याला पोलिसांनी अटक करावी, अशी मागणी ऋषी गुप्ता याने केली आहे.