राज ठाकरे यांच्याविरुद्ध गुन्हा दाखल करा!

राज ठाकरे यांच्याविरुद्ध
गुन्हा दाखल करा!

सर्वोच्च न्यायालयात याचिका दाखल

सकाळ वृत्तसेवा
मुंबई, ता. १९ : राज्यातील हिंदी भाषेच्या सक्तीनंतर उद्‍भवलेला मराठी विरुद्ध अमराठी वाद आता सर्वोच्च न्यायालयात पोहोचला आहे. हिंदी भाषकांविरोधात चिथावणी आणि द्वेष पसरवत असल्याचा आरोप करून मनसे अध्यक्ष राज ठाकरे यांच्याविरोधात गुन्हा दाखल करावा, अशी मागणी करणारी जनहित याचिका शनिवारी (ता. १९) सर्वोच्च न्यायालयात करण्यात आली आहे.

हिंदी भाषकांवर होणाऱ्या हल्ल्यांविरोधात कारवाई करण्यासाठी पोलिसांकडे लेखी तक्रार करूनही राज ठाकरे यांच्यावर कोणतीच कारवाई किंवा गुन्हा दाखल करण्यात आला नाही. त्यामुळे सर्वोच्च न्यायालयात धाव घेतल्याचे याचिकाकर्ते घनश्याम उपाध्याय यांनी जनहित याचिकेत म्हटले आहे.

राज ठाकरे यांच्या द्वेषपूर्ण भाषणांमुळे संघर्ष पेटण्याची शक्यता असून, अमराठी भाषकांवर मराठी भाषा लादली जात असल्याचा आरोप याचिकेत करण्यात आला आहे. त्यांच्या द्वेषपूर्ण भाषणांमुळे हिंसाचाराची शक्यता असून, त्यांच्याविरुद्ध गुन्हा दाखल करून त्यांच्या पक्षाची निवडणूक आयोगातील नोंदणी रद्द करावी. राज ठाकरे आणि त्यांच्या पक्षाच्या कार्यकर्त्यांची कृती ही संविधानाच्या मूळ भावनेच्या आणि सर्वोच्च न्यायालयाच्या ललिता कुमारी प्रकरणात दिलेल्या निर्णयातील मार्गदर्शक तत्त्वांविरोधात असल्याचेही याचिकेत म्हटले आहे.

काय प्रकरण?
महाराष्ट्रात काही दिवसांपासून हिंदीसक्तीचा मुद्दा गाजत असून, मराठी विरुद्ध अमराठी असा वाद निर्माण झाला आहे. याच मुद्द्यावरून उद्धव आणि राज ठाकरे यांच्यात जवळीक वाढली. हिंदीसक्ती रद्द केल्यानंतर या ठाकरे बंधूंनी मुंबईत मेळावा घेतला होता. त्या मेळाव्यातही राज ठाकरे यांनी हिंदी भाषेवरून गंभीर इशारा दिला होता. शुक्रवारी (ता. १८) राज ठाकरे यांनी ठाणे जिल्ह्यातील मिरा-भाईंदरमध्ये झालेल्या सभेतही परप्रांतीयांविरोधात आक्रमक भाषण करताना इशारा दिला.