तरुणाच्या अंगावर कार घालत नेले फरफटत

तरुणाच्या अंगावर कार घालत नेले फरपटत
नवी मुंबई, ता. १९ (वार्ताहर) : वाशी येथे शुक्रवारी (ता. १८) रात्री एका क्षुल्लक कारणावरून झालेल्या वादातून एका कारचालकाने दुसऱ्या चालकाला आपल्या कारच्या बोनेटवरून सुमारे ५०० मीटरपर्यंत फरपटत नेल्याची धक्कादायक घटना घडली. या घटनेत जखमी झालेल्या उमेश सुधाकर वाठोरे (वय ३०) यांच्यावर रुग्णालयात उपचार सुरू आहेत. या प्रकरणातील आरोपी कारचालक व त्याच्या साथीदाराविरोधात गुन्हा दाखल करून पुढील कारवाईला सुरुवात केली आहे.
घणसोली येथील रहिवासी असलेले उमेश वाठोरे यांची कार कोपरखैरणे येथील दिलीप सोपान बंदीछोडे (४७) याच्या इर्टिगा कारला घासल्याने हा वाद सुरू झाला. वाद विकोपाला गेल्यानंतर दिलीप याने उमेश यांच्या अंगावर कार घातली. उमेश कारच्या बोनेटवर पडल्यानंतरही दिलीप याने त्यांना तशाच धोकादायक स्थितीत वाशी सेक्टर एकमधील बसथांब्यापासून न्यू बॉम्बे हायस्कूलपर्यंत फरपटत नेले. न्यू बॉम्बे स्कूलसमोरील गतिरोधकामुळे उमेश खाली पडले. याप्रकरणी वाशी पोलिसांनी दिलीप बंदीछोडे आणि त्याचा साथीदार रुतिक रोहिदास सनके (२४) यांच्याविरोधात गुन्हा दाखल केला आहे. दरम्‍यान, आरोपी दिलीप बंदीछोडेदेखील रुग्णालयात उपचार घेत आहे.