पीएचडी विद्यार्थ्याचे निलंबन रद्द

पीएचडी विद्यार्थ्याचे निलंबन रद्द 

न्यायालयाचे आयआयटी मुंबईला आदेश 

सकाळ वृत्तसेवा
मुंबई, ता. १९ : भारतीय तंत्रज्ञान संस्था (आयआयटी) मुंबईच्या मानवाधिकार आणि सामाजिक विज्ञान विभागातील पीएचडीचा विद्यार्थी अक्षय सावंत याच्या निलंबनाचा निर्णय उच्च न्यायालयाने नुकताच रद्द केला. निलंबनाच्या निर्णयाचा याचिकाकर्त्याच्या कामगिरीवर कोणताही परिणाम होणार नाही, असे न्यायालयाने आदेशात म्हटले केले. 

आंबेडकर-पेरियार फुले स्टडी सर्कल (एपीपीएससी)चा विद्यार्थी संघटनेचा सक्रिय सदस्य सावंतला २८ एप्रिलला माध्यमांना बेकायदा मुलाखती दिल्याचा आरोप करून व्यवस्थापनाने ३१ डिसेंबरपर्यंत त्याला निलंबित केले होते. या निर्णयाविरोधात सावंतने उच्च न्यायालयात धाव घेतली होती. न्या. मकरंद कर्णिक आणि न्या. नितीन बोरकर यांच्या खंडपीठाने २५ जुलैपासून नवीन शैक्षणिक वर्षाची सुरुवात होणार असल्याची दखल घेतली. शिस्तभंग कृती समितीच्या ३ एप्रिलच्या बैठकीनंतर महानिबंधकाने त्याच्या निलंबनाचा आदेश काढला होता. आपल्या संमतीशिवाय संबंधित वृत्तपत्राने चुकीची प्रतिक्रिया प्रसिद्ध केल्याचा दावा या बैठकीत सावंतने केला होता. त्यावर याचिकाकर्त्याचे वक्तव्य वैयक्तिक होते. त्याची शैक्षणिक कारकीर्द धोक्यात येऊ नये यासाठी त्याचे निलंबन रद्द करावे, असे आदेश न्यायालयाने दिले. तसेच आयआयटी मुंबईला २५ जुलैपासून लागू होणारा निलंबन निर्णय रद्द करण्याचे आदेश दिले.