रस्‍त्‍याच्या खोदकामात गॅसवाहिनी

पेण, ता. २० (वार्ताहर) : शहरात सुरू असणाऱ्या काँक्रीटीकरणाच्या कामामुळे रस्त्यांवर ठिकठिकाणी पाणी तुंबते आहे. चिंचपाडा पाम बीच रस्‍त्‍यावर पाण्याचा निचरा करण्यासाठी गटाराचे खोदकाम सुरू असताना महानगर गॅसवाहिनीला जेसीबीचा फावडा लागल्याने ती फुटली. त्‍यामुळे आगडोंब उसळला. त्‍वरित गॅसपुरवठा बंद करण्यात आल्‍याने मोठा अनर्थ टळला.
रस्त्यांच्या काँक्रीटीकरणासाठी कोट्यवधी रुपये खर्च करण्यात येत आहेत, मात्र काम करताना पाण्याचा निचरा होण्याबाबत योग्‍य नियोजन न केल्‍याने पाणी तुंबते. चिंचपाडा पाम बीच मार्गावर
एका इलेक्ट्रॉनिक दुकानाजवळ शनिवारी (ता. २०) दुपारी गटार खोदण्याचे काम सुरू असताना महानगर गॅसवाहिनीला जेसीबीचा फावडा लागला. त्‍यामुळे आगडोंब उसळताच नागरिकांमध्ये भीतीचे वातावरण पसरले. याप्रकरणी मंगळवारी महानगर गॅसचे अधिकारी यांची बैठक बोलावली असून, तत्काळ काय उपाययोजना करण्यात येईल, अशी माहिती पेणचे मुख्याधिकारी जीवन पाटील यांनी दिली.