स्‍पा सेंटरबाहेरील गौतम बुद्धांची मूर्ती हटवली

स्‍पा सेंटरबाहेरील गौतम बुद्धांची मूर्ती हटवली;
वाशीतील प्रकार

नवी मुंबई, ता. २० (वार्ताहर) : वाशी सेक्टर-१७ मधील अरेंजा कॉर्नर इमारतीजवळ स्‍पा सेंटरबाहेर पदपथावर सापडलेली गौतम बुद्धांची मूर्ती वाशी पोलिसांनी वेळीच सुरक्षित स्थळी हलवली. त्यामुळे संभाव्य विटंबनेची घटना टळली आहे.
वाशी सेक्टर-१७ मधील अरेंजा कॉर्नर इमारतीत असलेल्या एका स्पा सेंटरच्या बाहेरील भिंतीवर गौतम बुद्धांची पीओपीची मूर्ती लावण्यात आली होती. ही मूर्ती पदपथावर असल्याने तिला धक्का लागून विटंबना होण्याची शक्यता होती. याबाबतची माहिती एका जागरूक नागरिकाने व्हॉट्सॲप संदेशाद्वारे दिल्यानंतर वाशी पोलिस ठाण्याचे वरिष्ठ निरीक्षक संजय धुमाळ सूचनेनुसार गोपनीय पथकाने घटनास्थळी जाऊन पाहणी केली. धार्मिक भावना दुखावू नये तसेच कायदा-सुव्यवस्थेचा प्रश्न उद्भवू नये म्‍हणून गोपनीय पथकातील अमलदारांनी तत्काळ नवी मुंबई महापालिकेच्या सी वॉर्ड अतिक्रमण विभागाला माहिती देत गौतम बुद्धांची पीओपीची मूर्ती सुस्थितीत काढून महापालिका अतिक्रमण विभागाच्या ताब्यात दिली.

अंमलदारांचे कौतुक
कारवाईदरम्यान वाशी पोलिस ठाण्यातील गोपनीय पथकातील अंमलदारांनी प्रसंगावधान राखून कायदा-सुव्यवस्थेचा प्रश्न निर्माण होऊ न देता परिस्थिती योग्य प्रकारे हाताळली. पोलिसांनी वेळीच घेतलेल्या उपाययोजनांमुळे संभाव्य वाद टळल्याने त्यांच्या कामगिरीचे कौतुक होत आहे. या अंमलदारांच्या कामगिरीची दखल विशेष शाखेच्या उपायुक्त रश्‍मी नांदेडकर यांनी घेतली असून, त्‍यांना बक्षीसही घोषित केले आहे.