रोशनी फाउंडेशनतर्फे डहाणूत शालेय साहित्याचे वाटप

कासा (बातमीदार) : आदिवासी विद्यार्थ्यांच्या शैक्षणिक सक्षमीकरणासाठी एक महत्त्वपूर्ण पाऊल उचलत, मुंबईतील रोशनी फाउंडेशन अ‍ॅण्ड चॅरिटेबल ट्रस्ट आणि रोटरी क्लब ऑफ मुंबई लॉकर्स यांच्या संयुक्त विद्यमाने डहाणू तालुक्यातील २४ जिल्हा परिषद शाळा आणि दोन वरिष्ठ महाविद्यालयांमधील विद्यार्थ्यांना मोफत शैक्षणिक साहित्याचे वाटप करण्यात आले. सुमारे ३,५०० गरजू मुलांना या वाटपाचा लाभ मिळाला. हा समारंभ डहाणूतील बहारे जिल्हा परिषद शाळेत पार पडला. समारंभाचे प्रमुख अतिथी म्हणून डॉ. उर्मीबेन देसाई आणि डॉ. दत्तात्रय शिंदे उपस्थित होते. रोशनी फाउंडेशनच्या ट्रस्टी गीता मुच्छाला, तसेच विनायकराव बी. पाटील कॉलेजचे संचालक अभय पाटील यांची उपस्थिती लाभली. डॉ. शिंदे यांनी रोशनी शब्दाचे विविध अर्थ समजावून देत मुलांना शिक्षणाचे महत्त्व पटवून दिले. घेता घेता देणाऱ्याचे हात घ्या, असा मोलाचा सल्लादेखील दिला. मान्यवरांच्या हस्ते विद्यार्थ्यांना पाट्या, वह्या, तसेच खडू रंग आदी साहित्याचे वाटप करण्यात आले.