धरणाची सुरक्षा धोक्‍यात

ओवे धरणाची सुरक्षा रामभरोसे
पर्यटकांच्या पार्ट्या जोरात; सुरक्षा रक्षक नेमण्याची मागणी
खारघर, ता. २१ (बातमीदार) : खारघरमधील ओवे डोंगराच्या कुशीत असलेल्या धरणाच्या सान्निध्यात पर्यटकांच्या पार्ट्या रंगत आहेत. या पार्ट्या तरुणांच्या जीवावर बेतत असल्याच्या घटना घडल्या आहेत. विशेष म्‍हणजे गेल्या दोन महिन्यांत दोन तरुणांचा बुडून मृत्यू झाल्याची घटना घडली आहे. त्‍यामुळे पनवेल महापालिकेने धरणावर सुरक्षा रक्षकांची नेमणूक करावी, अशी मागणी परिसरातील रहिवाशांकडून केली जात आहे.
ओवे डोंगराच्या पायथ्याशी असलेल्या धरणाच्या विकासासाठी पनवेल महापालिकेने मंजुरी दिली आहे. पाच कोटी रुपये खर्च करून धरणाचा विकास केला जाणार आहे. या धरणातील पाण्याचा उपयोग खारघरवासीयांसाठी केला जाणार आहे, मात्र धरणावर सुरक्षेचा अभाव असल्यामुळे गेल्या १० वर्षांत अंघोळ करताना आणि पाण्याचा अंदाज न आल्यामुळे अनेक तरुणांचा बुडून मृत्यू झाल्याच्या घटना घडल्या आहेत. विशेष म्हणजे दरवर्षी पावसाळ्यात पोलिसांकडून पांडवकडा धबधबा पर्यटन क्षेत्र प्रतिबंधित क्षेत्र घोषित करून येथील धबधबा, धरण व तलाव आदी ठिकाणी प्रवेश मनाई केली जाते. विनापरवाना प्रवेश केल्याचे आढळून आल्यास कायदेशीर कारवाई केली जाईल, असे फलक लावले जातात, मात्र ठोस कारवाई होताना दिसून येत नाही. ओवे धरण हे डोंगराच्या मध्यभागी असून, वाडी आणि वसाहतीपासून दूर असल्यामुळे पर्यटकांच्या परिसरात पार्ट्या जोरात रंगत असतात, सिडकोच्या अग्निशमन केंद्राकडून मिळालेल्या माहितीनुसार धरणावर गेल्या दोन महिन्यांत दोन तरुणांचा बुडून मृत्यू झाल्याची घटना घडली आहे. त्‍यामुळे पालिकेने धरणावर सुरक्षा रक्षकांची नेमणूक करावी, अशी मागणी परिसरातील रहिवाशांकडून केली जात आहे. यासंदर्भात पालिकेचे उपायुक्त कैलास गावडे म्हणाले की, धरणावर पालिकेने सुरक्षा राक्षकाची नेमणूक केली आहे. तलाव परिसरात पर्यटक येणार नाही, यासंदर्भात सुरक्षा रक्षकांना सूचना केली जाईल.
..........................
कोट :
पावसाळ्यात परिसरातील डोंगर-दऱ्यातून कोसळणाऱ्या धबधब्याखाली मनसोक्त अंघोळीचा आनंद पर्यटक घेतात. त्यातील ओवे डोंगरातील धरणावर सुरक्षा रक्षक नसल्यामुळे अंघोळ करताना काही तरुण बुडून मृत्युमुखी पडल्याची घटना घडली आहे. पालिका या तलावाचा विकास करणार असल्याचे समजले. पालिकेने विकास करण्यापूर्वी तरुणांचा बळी जाऊ नये, यासाठी सुरक्षा रक्षकांची नेमणूक करावी.
- मन्सूर पटेल, ग्रामस्थ, ओवेगाव
...................
आयुक्तांच्या सूचनेकडे दुर्लक्ष
पनवेल महापालिका अस्तित्वात आल्यावर तत्कालीन पालिका आयुक्त सुधाकर शिंदे यांनी ओवे धरणाची पाहणी करून पाणीगळतीचे प्रमाण रोखण्यासाठी उपाययोजना करावी आणि परिसर स्वच्छ करावा, अशा सूचना अधिकाऱ्यांना दिल्या होत्या, मात्र त्यांची बदली होताच आदेशाकडे दुर्लक्ष केल्याचे दिसून येते.