रायगडच्या जनतेच्या मनातील आपणच पालकमंत्री

रायगडच्या जनतेच्या मनातील आपणच पालकमंत्री
खोपोलीतील पक्ष प्रवेश सोहळ्यात मंत्री भरत गोगावले यांचे प्रतिपादन
खोपोली, ता. २१ (बातमीदार) ः रायगडमधील जनतेच्या मनातील आपणच पालकमंत्री आहोत. लवकरच यावर शिक्‍कामोर्तब होईल, असे प्रतिपादन मंत्री भरत गोगावले यांनी केले. रविवारी (ता. २०) खोपोलीतील समर्थ मंगल कार्यालयाच्या सभागृहात शिवसेना शिंदे गट आयोजित कार्यकर्ता मेळावा व भव्य पक्ष प्रवेश सोहळा मंत्री भरत गोगावले यांच्या प्रमुख उपस्थितीत पार पडला. या वेळी बोलताना त्‍यांनी आपल्या मनातील भावना व्‍यक्‍त केल्या. या वेळी माजी उपनगराध्यक्ष व राष्ट्रवादी काँग्रेसचे नेते कुलदीपक शेंडे, माजी नगरसेवक दिलीप जाधव, सामाजिक कार्यकर्ते व युवा उद्योजक संदीप पाटील, राजन घोसाळकर यांच्यासमवेत कुलदीपक शेंडे समर्थक शेकडो कार्यकर्त्यांनी शिवसेनेत जाहीर पक्ष प्रवेश केला. या कार्यक्रमाला खासदार श्रीरंग बारणे, आमदार महेंद्र थोरवे, जिल्हाप्रमुख संतोष भोईर, संपर्कप्रमुख विजय पाटील यांच्यासमवेत खोपोली, कर्जत व खालापुरातील सर्व पदाधिकारी उपस्थित होते.
आमदार महेंद्र थोरवे यांच्या अध्यक्षतेखाली झालेल्या या कार्यकर्ता मेळावा व पक्षप्रवेश कार्यक्रमाने शिवसेनेकडून आगामी स्थानिक स्वराज्य संस्थांच्या निवडणुकीचे बिगुल वाजवून जोरदार आखणी केल्याचे दिसून आले. कार्यक्रमाचे प्रास्ताविक शहरप्रमुख संदीप पाटील यांनी केले. मेळाव्याला मार्गदर्शन करताना आमदार थोरवे यांनी कोणत्याही परिस्थितीत खोपोली नगरपालिका व खालापूर पंचायत समिती तसेच रायगड जिल्हा परिषदेवर शिवसेनेचा भगवा झेंडा डौलाने फटकविण्याचा संकल्प प्रत्येकाने करावा, असे आवाहन केले. खासदार बारणे यांनी मार्गदर्शन करताना केंद्र व राज्यात आपली सत्ता असल्याने विकासकामांसाठी निधीची कोणतीही कमतरता निर्माण होणार नसल्याची ग्वाही दिली.
राज्याचे रोजगार हमी व फलोत्पादन मंत्री भरत गोगावले यांनी त्यांच्या स्टाइलमध्ये विरोधकांची फिरकी घेत आपण गरीब जनतेचा शेठ असून, रायगड जिल्ह्यातील जनतेच्या मनातील पालकमंत्री असल्याचे सांगून लवकरच हे वास्तवात येईल, यावर शिक्‍कामोर्तब केले. त्यामुळे शिवसैनिकांनी कोणतीही काळजी करण्याची गरज नसल्याचे त्‍यांनी स्पष्ट केले. नव्याने पक्ष प्रवेश केलेले माजी नगराध्यक्ष कुलदीपक शेंडे यांनी बोलताना आमदार महेंद्र थोरवे यांच्या विकासाचा झंझावात व कामाची पद्धतीने आकृष्ट होऊन मी व माझ्या समर्थकांनी शिवसेनेत प्रवेश केला हे स्पष्ट केले.