किसान दिनानिमित्त शेतकरी महिलांना कर्ज वाटप

किसानदिनानिमित्त शेतकरी महिलांना कर्जवाटप
अलिबाग, ता. २१ (वार्ताहर) ः बँक ऑफ इंडियातर्फे बँक राष्ट्रीयीकरणाच्या स्मृतिप्रीत्यर्थ शनिवारी (ता. १९) किसान दिवस म्हणून साजरा करण्यात आला. या दिवशी बँकेच्या रायगड जिल्ह्यातील सर्व शाखांमध्ये शेतकरी, कष्टकरी आणि महिलांचा सन्मान करून त्यांना कर्जवाटप केले गेले. या कार्यक्रमास जिल्हाधिकारी किशन जावळे, मुख्य महाव्यवस्थापक सुनील शर्मा, एफजीएमओ मुंबई दीपान्विता साहनी-बोस, रायगड विभागीय व्यवस्थापक तथा प्रकल्प संचालक प्रियदर्शिनी मोरे, उपविभागीय व्यवस्थापक बिरेन चटर्जी, उपविभागीय व्यवस्थापक भरत सहाय, अग्रणी जिल्हा व्यवस्थापक विजय कुलकर्णी आदी उपस्थित होते.
बँक ऑफ इंडिया ही फक्त नावाला रायगड जिल्ह्याची अग्रणी बँक नसून सर्व कामात पहिल्या क्रमांकावर राहणारी बँक आहे, असे कौतुक जिल्हाधिकारी जावळे यांनी या वेळी केले. या कार्यक्रमात सामाजिक सुरक्षा योजनेंतर्गत लाभ घेतलेल्या व मृत्यू झालेल्या दोन लाभार्थींच्या वारसदारास प्रत्येकी दोन लाख रुपयांच्या धनादेशाचे वाटप करण्यात आले. मुख्य महाव्यवस्थापक सुनील शर्मा यांनी कृषी वित्त पुरवठ्यासाठी बँकेचा पाठिंबा आणि तयारी असल्याचे सांगताना बँकेच्या योजनांचा लाभ घेण्याचे आवाहन उपस्थितांना केले. त्याचबरोबर जिल्हा प्रशासनाबरोबर योग्य समन्वय राखून केंद्र आणि राज्य शासनाच्या सर्व योजना राबवण्यात बँक ऑफ इंडिया नेहमीच अग्रेसर राहील, याबाबत उपस्थितांना आश्वासन दिले. विभागीय व्यवस्थापक दीपन्विता सहानी- बोस यांनी उपस्थितांचे स्वागत करून कृषी, एमएसएमई आणि रिटेल फायनान्समधील बँकेची भूमिका तसेच शासकीय योजनांच्या यशस्वी अंमलबजावणीसाठी दिलेल्या समर्थनाबद्दल सविस्तर माहिती दिली. प्रकल्प संचालक मोरे यांनी जिल्ह्यातील बचत गट, वित्तपुरवठ्यात बँक ऑफ इंडियाच्या ८० टक्क्‍यांपेक्षा जास्त योगदानाचे कौतुक केले. विविध योजनांच्या लाभार्थ्यांना मंजुरीपत्रे वाटप करण्यात आली. अग्रणी जिल्हा व्यवस्थापक कुलकर्णी यांनी आभार प्रदर्शन केले.