रोहा

कोंबडी चोरीप्रकरणी रोह्यात गुन्हा दाखल
रोहा, ता. २१ (बातमीदार) ः तालुक्यातील सांगडे-उडदवणे गावातील तरुण मयूर आंबाजी कोल्हाटकर याने पोल्ट्रीव्यवसाय सुरू केला. दरम्यान, देवकान्हे आदिवासीवाडीतील सुनील ऊर्फ राहुल अशोक वाघमारे याने शनिवारी (ता. १९) सकाळी आठ ते दुपारी एक वाजण्याच्या सुमारास कोल्हाटकरच्या पोल्ट्री फार्मची जाळी उचकटून सहा हजार ३०० रुपये किमतीच्या १७ गावठी कोंबड्या चोरल्‍या. याप्रकरणी कोल्‍हाटकर यांनी रोहा पोलिस ठाण्यात तक्रार दाखल केल्‍यावर गुन्हा दाखल झाला आहे. घटनेतील कोंबडीचोराचा पोलिस शोध घेत आहेत.

------------

रोह्यात बालविवाहप्रकरणी पाच जणांवर गुन्हा
रोहा, ता. २१ (बातमीदार) ः तालुक्यातील तांबडी बौद्धवाडी येथे १६ वर्षीय मुलीचा विवाह लावून दिल्याचा प्रकार दोन महिन्यांपूर्वी घडला होता. ही घटना ताजी असताना याच परिसरात आणखी एक बालविवाहाचा प्रकार समोर आला आहे. एका १७ वर्षीय मुलीने अलिबाग येथील जिल्हा रुग्णालयात मुलाला जन्म दिल्यावर या घटनेला वाचा फुटली. पोलिसांनी मुलीच्या पतीसह आई-वडील, सासू-सासऱ्यांवर रोहा पोलिस ठाण्यात गुन्हा दाखल केला आहे. रोहा शहरापासून जवळ असणाऱ्या ताम्हणशेत येथील १७ वर्षे पाच महिने वय असलेल्या मुलीचा विवाह पिंगळसई आदिवासीवाडीतील सुशांत राम हिलमबरोबर करण्यात आला. मुलगी गर्भवती राहिल्‍यावर तिला उपचारासाठी अलिबाग जिल्हा रुग्णालयात दाखल करण्यात आले. तिने मुलाला जन्म दिल्‍यावर ती अल्‍पवयीन असल्‍याचे उघड झाले आहे.