तळोजा औद्योगिक क्षेत्रात नवीन वाहनतळ!

पनवेल, ता. २१ (बातमीदार) ः तालुक्यातील मोठी आणि महत्त्वाची औद्योगिक वसाहत तळोज्‍यात असून, येथे १,१००हून अधिक कारखाने कार्यरत आहेत. यामुळे परिसरात मोठ्या प्रमाणावर अवजड वाहनांची वर्दळ असून, रस्त्यांवर मोठी वाहतूक कोंडी होते. दिवसेंदिवस ही समस्या गंभीर होत असून, स्थानिक नागरिक, कामगार आणि उद्योग-व्यवसायाला मोठा त्रास सहन करावा लागतो. या प्रश्नाकडे लक्ष वेधत आमदार विक्रांत पाटील यांनी ठाम भूमिका घेत, वाहतूक नियोजनातील अभावावर आवाज उठवला.
सध्या उपलब्ध १४० वाहनांच्या क्षमतेचे वाहनतळ पूर्णपणे वापरले जात असल्याचे अधिकाऱ्यांचे म्हणणे आहे; परंतु वस्तुस्थिती वेगळी असून, पार्किंगमध्ये गाड्या न लावता रस्त्यावर अवजड वाहने उभी करण्यात येत आहेत. यामुळे स्थानिकांना दररोज कोंडीचा सामना करावा लागतो. तळोजा परिसरात वाहतूक व्यवस्थापनासाठी वाहतूक पोलिसांची संख्या अपुरी असून, मनुष्यबळ वाढवणे गरजेचे असल्‍याचे पाटील यांनी सांगितले.
तळोजा परिसरात नवीन आणि अधिक क्षमतेचे ट्रक टर्मिनल उभारणे अत्यावश्यक आहे. याकरिता एमआयडीसीने नवीन भूखंड तातडीने उपलब्ध करून द्यावा आणि सुसज्ज वाहनतळाची व्यवस्था करावी, अशी मागणी विक्रांत पाटील यांनी सभागृहात केली.

कोंडी दूर करण्यासाठी आढावा घेणार
तळोजा औद्योगिक वसाहतीतील वाहतूक कोंडी सोडवण्याच्या मुद्द्यावर सकारात्मक प्रतिसाद देत मुख्यमंत्री देवेंद्र फडणवीस व गृहराज्यमंत्री पंकज भोयर यांनी तातडीने नवीन वाहनतळ करण्यासंदर्भात निर्देश संबंधित अधिकाऱ्यांना दिले आहेत. तसेच येथील वाहतूक कोंडी दूर करण्याकरिता आढावा घेऊन योग्य सूचना देण्यात येतील, असे मंत्र्यांनी स्पष्ट केले आहे.
----------