पनवेलमधील आदई सर्कलला खड्ड्यांचे ग्रहण

पनवेलमधील आदई सर्कलला खड्ड्यांचे ग्रहण
गाड्या बंद पडत असल्याने कोंडीत भर
नवीन पनवेल, ता. २१ (बातमीदार) ः पनवेल येथील आदई सर्कलजवळ मोठ्या प्रमाणात खड्डे पडले आहेत. त्‍यामुळे वाहनचालकांचा अपघात होत असून, वाहतूक मंदावत आहे. या खड्ड्यांमुळे वाहतूक कोंडी होत असून, पोलिसांची डोकेदुखी वाढली आहे.
खांदा कॉलनी, आदई, नेरे, नवीन पनवेल या ठिकाणांना जोडणारा महत्त्वपूर्ण चौक म्‍हणून आदई सर्कलकडे पाहिले जाते. सर्कलवर दिवसरात्र मोठ्या प्रमाणात वाहतूक असते, मात्र मागील काही दिवसांपासून सर्कलवर मोठ्या प्रमाणात खड्ड्यांचे प्रमाण वाढले आहे. त्‍यामुळे वाहनचालकांचे अपघात होत असून, वाहतूक मंदावली आहे. अनेक वाहनचालकांची गाडी खड्ड्यात बंद पडत असल्याने मोठ्या प्रमाणात वाहतूक कोंडी होत आहे. यामुळे पोलिसांना कसरत करून बंद पडलेल्या गाडीला बाजूला करावे लागते. यामुळे अन्य वाहनचालकांची गैरसोय होत असून, पोलिसांचीदेखील डोकेदुखी वाढली आहे. यामध्ये सर्वाधिक दुचाकींचे प्रमाण जास्‍त असल्याचे बोलले जात आहे. त्‍यामुळे पनवेल महापालिकेने या मार्गावरील खड्ड्यांची दुरस्‍ती तत्‍काळ करावी, अशी मागणी वाहनचालकांकडून करण्यात येत आहे.
....................
कोट
मोठ्या खड्ड्यात वाहने अडकली तर मागे कोंडी निर्माण होते. त्यामुळे ती वाहने काढताना आम्हालाच मदत करावी लागते. सर्वांना घरी किंवा इच्छितस्थळी जाण्याची घाई असल्याने मदतीसाठी कुणी थांबत नाही. त्यामुळे आम्हाला दुहेरी भूमिका निभवावी लागते.
-कल्पेश पाटील, वाहतूक पोलिस, नवी मुंबई
...............
आदई सर्कलपासून नेरेकडे जाणारा एकच रस्ता असल्याने वाहतूक पोलिसांची परवानगी मिळत नाही. त्या ठिकाणी चोहोबाजूंनी काँक्रीटीकरणाचे काम झाले आहे. फक्त त्या चौकातील काम बाकी आहे. वाहतूक पोलिसांशी बोलून लगेच काम सुरू होईल.
-संजय कटेकर, शहर अभियंता, पनवेल महापालिका