बेलापूर रेल्वे स्थानक समस्यांच्या गर्तेत

बेलापूर रेल्वेस्थानक समस्यांच्या गर्तेत
सुरक्षा व्‍यवस्‍थेसह साफसफाईचा अभाव; प्रवाशीवर्ग त्रस्‍त
नवी मुंबई, ता. २१ (वार्ताहर) : बेलापूर सीबीडी रेल्वेस्‍थानक मध्य रेल्वेच्या हार्बर मार्गावरील महत्त्वाचे स्‍थानक आहे, मात्र मागील काही वर्षांपासून स्‍थानकातील अनेक समस्यांचा सामना प्रवाशीवर्गाला करावा लागत आहे. स्थानकाच्या फ्लॅटफॉर्मवर पिण्याच्या पाण्याची समस्या, कचराकुंडीतील कचरा वेळेत न उचलणे, तुटलेली कचराकुंडी न बदलणे, संध्याकाळच्या सुमारास स्थानकाबाहेर फेरीवाल्यांचा वाढता उपद्रव यामुळे प्रवासी त्रस्त झाले आहेत. त्याशिवाय बेलापूर रेल्वेस्थानकावर अवाढव्य कमर्शिअल कॉम्प्लेक्स उभारण्यात आल्याने त्यात मेट्रो रेल्वेची भर पडली असून, पार्किंगची समस्या भेडसावू लागली आहे.
बेलापूर परिसराला सेंट्रल बिझनेस डिस्ट्रीक्टचा दर्जा देण्यात आल्यामुळे परिसरात विविध सरकारी कार्यालयांसोबतच खासगी कार्यालये मोठ्या प्रमाणात निर्माण झाली आहेत. त्याच अनुषंगाने बेलापूर रेल्वेस्थानकावर सिडकोने मोठ्या प्रमाणावर कमर्शिअल कॉम्फ्लेक्सची उभारणी केली, परंतु वाणिज्य गाळ्यांची, दुकानांची विक्री करण्यात सिडकोला अपयश आले. त्यामुळे बेलापूरसह अन्य रेल्वेस्थानकांवरील अनेक वाणिज्य वापराच्या जागा या वर्षानुवर्षे रिकाम्या पडून राहिल्या आहेत. या जागांची वेळेत देखभाल दुरुस्ती व डागडुजी न केल्याने अनेक वाणिज्य जागांची पडझडदेखील झाल्याचे दिसून येत आहे.
रेल्वेस्थानक वगळता त्यावरील वाणिज्य संकुलच्या देखभाल दुरुस्तीसाठी सिडकोने बेलापूर रेल्वेस्थानक कमर्शिअल कॉम्प्लेक्स लिमिटेड (बीआरएससीसीएल) या स्वतंत्र कंपनीची स्थापना केली आहे. या कंपनीवर फक्त वाणिज्य संकुलाची देखभाल दुरुस्ती, साफसफाई, सुरक्षा व्यवस्था सोपविली आहे, परंतु रेल्वेस्थानक व स्थानकाच्या बाहेरील पायाभूत सुविधांच्या देखभाल दुरुस्ती आणि साफसफाईकरिता सिडकोने कंत्राटदार नेमले आहेत, तर रेल्वेस्थानकातील सुरक्षा व्यवस्थेकरिता बोर्डाचे व एमएसएफचे सुरक्षा रक्षक नेमण्यात आले आहेत, परंतु याच सुरक्षा रक्षकांकडून चिरिमिरीच्या मोबदल्यात फेरीवाल्यांना फ्लॅटफॉर्मवर व रेल्वेस्थानकाच्या बाहेर बसवले जात असल्याचे बोलले जात आहे. त्यामुळे बेलापूर रेल्वेस्थानकाच्या प्रवेशद्वारावर संध्याकाळच्या सुमारास फेरीवाल्यांची गर्दी दिसून येते.
................
बेलापूर रेल्वेस्थानकाबाहेरील पेव्हर ब्लॉक कित्येक दिवसांपूर्वी उखडले गेले आहेत, परंतु त्याची दुरुस्ती होत नाही. पार्किंग परिसरात घाणीचे साम्राज्य पसरले आहे. त्याकडे दुर्लक्ष केले जात आहे. दरम्यान, रेल्वेस्थानकात उभारण्यात आलेल्या वाणिज्य संकुलात कामानिमित्त येणारे अधिकारी, कर्मचाऱ्यांना यापूर्वी पार्किंगची असलेली सुविधा काढून सिडकोने ती रेल्वे प्रवाशांना उपलब्ध करून देण्यासाठी कंत्राटदाराकडे दिले आहे. त्यामुळे रेल्वेस्थानक परिसरातील पार्किंगचा प्रश्न ऐरणीवर आला आहे.
............................
बेलापूर रेल्वेस्थानक परिसरातील फेरीवाल्यांमुळे प्रवाशांना त्रास होत आहे. तसेच मट्रो स्टेशनमुळे बेलापूर रेल्वेस्थानक परिसरातील पार्किंगची समस्या वाढली आहे. रिक्षाचालकांचा मनस्ताप प्रवाशांना सहन करावा लागत असून, भिकाऱ्यांची मुजोरी वाढली आहे. तसेच रेल्वेस्थानक अंतर्गत पंखे, पाण्याचे नळ बंद अवस्थेत असणे, तुटलेले कचऱ्याचे डबे आदी समस्यांकडे प्रशासन दुर्लक्ष करत आहे.
-किरण गायकवाड (प्रवासी)