संस्कृती समजून घेण्यासाठी वाचन महत्त्वाचे

संस्कृती समजून घेण्यासाठी वाचन महत्त्वाचे
प्राध्यापक प्रदीप पाटील यांचे प्रतिपादन
वसई, ता. २१ (बातमीदार) : पुस्तके हद्दपार झाली तर संस्कृती नष्ट होईल. त्यामुळे आपल्याला पुढच्या पिढीकडे वारसा न्यायचा आहे. सांस्कृतिक भूक पुस्तकातून भागते. आपली संस्कृती समजून घेण्यासाठी वाचन महत्त्वाचे आहे हे विसरू नये, असे प्रतिपादन न्यू इंग्लिशचे प्राध्यापक व प्रमुख वक्ते प्रदीप पाटील यांनी वसईत केले.

वसई येथील कै. डॉ. धोंडो गोविंद अभ्यंकर स्मृती ग्रंथालय व वाचनालय यांच्या संयुक्त विद्यमाने वाचक मेळाव्याचे आयोजन प्रभाग समिती आय येथे करण्यात आले होते. या वेळी वाचन संस्कृती प्रचार-प्रसार याविषयी व्यापक स्वरूपात माहिती देण्यात आली. या कार्यक्रमात प्रमुख वक्ते प्रदीप पाटील, कवी तथा लेखिका वीणा चाफेकर, कथाकार विभूती चाफेकर, प्रभाग समिती कार्यालय अधीक्षक विजय पाटील, ज्येष्ठ वाचक रश्मी दिवेकर, सहाय्यक ग्रंथपाल मनाली पाटील, सहाय्यक ग्रंथपाल नंदिनी नाईक, भूषण वर्तक, संतोष जाधव यांच्यासह वाचकवर्ग, सत्कारमूर्ती विद्यार्थी, नागरिक महापालिकेचे कर्मचारी उपस्थित होते.

प्रदीप पाटील म्हणाले, की वाचन संस्कृती ही ज्ञान, कला, चालीरीती यांचे अंग आहे. वाचन हे आपल्याला नवी ऊर्जा देत असते. केवळ अभ्यासापुरती नव्हे तर कायम वाचनाची आवड जपावी.
वसई अभ्यासिका केंद्रातून परीक्षेचा अभ्यास करून सीए झालेले अंकित मेहता व ऋषिकेश पालसकर यांचा मान्यवरांच्या हस्ते सत्कार करण्यात आला. याच अभ्यासिकेत हरिप्रिया कुडू स्पर्धा परीक्षेची तयारी करीत आहे. तिने वाचनालयातून मिळणाऱ्या सहकार्याबद्दल मनोगत व्यक्त केले.

कवी वीणा चाफेकर म्हणाल्या, की पुस्तकातून ज्ञान मिळाले व त्यातून लिखाण सुरू झाले. त्यातून प्रेरणा मिळत गेली. वाचन नसते तर हे सारे घडले नसते. पुस्तक माझा मित्र आहे. लेखणी क्रांती घडवत असते. साहित्यात रियाज असतो. जीवनाचा अनुभव शब्दांत साकार होतो. त्यामुळे लेखक, कवी आपल्या भावना शब्दातून मांडत असतात. ते वाचन आपल्या जोडीला आयुष्यभर असते, असे या वेळी ज्येष्ठ वाचक रश्मी दिवेकर यांनी सांगितले. कार्यक्रमाचे सूत्रसंचालन भूषण वर्तक यांनी केले. आभार अधीक्षक संतोष जाधव यांनी मानले.

हाती पुस्तक घ्या
आजच्या तरुणांचा कल डिजिटलकडे अधिक आहे; मात्र पुस्तक हाती धरून वाचण्यात वेगळाच आनंद आहे. मन एकाग्र राहते. डिजिटल डोळ्यांसाठी हानिकारक आहे. आजच्या तरुण पिढीने वाचनसंस्कृती जपण्यासाठी व आपले ज्ञान वृद्धिंगत करण्यासाठी वाचन करावे. माझे जीवन वाचनाने सुसह्य झाले आहे, असे मार्गदर्शन कथाकथनकार विभूती चाफेकर यांनी केले.