पनवेलमध्ये प्रवाशावर हल्‍ला

पनवेल, ता. २१ (वार्ताहर) : पनवेल रेल्वेस्थानकाबाहेर बाकड्यावर झोपलेल्या एका प्रवाशावर लुटारूने हल्ला करून सोनसाखळी हिसकावली. शनिवारी (ता. १९) पहाटे चारच्या सुमारास ही घटना घडली. पनवेल शहर पोलिसांनी याप्रकरणी गुन्हा दाखल केला आहे.
हल्‍ल्‍यात जखमी झालेल्‍या प्रवाशाचे नाव निखिल निकम (२२) असे असून तो नेरूळ येथे राहतो. शनिवारी पहाटे निखिल पनवेल रेल्वेस्थानकात आला होता. रेल्वेस्थानकाबाहेरील बाकड्यावर झोपला असताना लुटारूने त्याच्या पॅन्टच्या खिशातील मोबाईल काढण्याचा प्रयत्न केला. निखिलला जाग आल्‍याने लुटारूने त्याच्या हातातील जड वस्तूने निखिलच्या डोक्यात मारून जखमी केले. त्यानंतर त्‍याची सोनसाखळी हिसकावून पळ काढला. घटनेनंतर निखिलने पनवेल शहर पोलिस ठाण्यात तक्रार दाखल केल्‍यावर गुन्हा दाखल करण्यात आला.