ठाण्यात दीड कोटींचे मेफेड्रोन जप्त

ठाण्यात दीड कोटींचे मेफेड्रोन जप्त
सकाळ वृत्तसेवा
ठाणे, ता. २१ : मुंब्रा बायपास उड्डाणपुलाजवळ सापळा लावून शहर पोलिसांनी सुमारे सव्‍वा किलो मेफेड्रोन (एमडी) हा अमली पदार्थ जप्त केला आहे. याची किंमत दीड कोटींहून अधिक आहे. याप्रकरणी मोहनलाल गुणेशाजी जोशी ऊर्फ शर्मा (वय ५५, रा. कुडूस, पालघर) या औषधविक्रेत्याला अटक करण्यात आली आहे.

पालघर जिल्ह्यातील कुडूस येथून एमडी पावडरची तस्करी होणार असल्याची माहिती शहर पोलिसांना १८ जुलैला मिळाला होती. त्यानुसार मुंब्रा बायपास उड्डाणपुलाजवळ सापळा लावण्यात आला होता. या मार्गावरून जाणाऱ्या संशयित कारची तपासणी केली असता, त्यात एक किलो २०९ ग्रॅम एमडी पावडर आढळली. या पावडरची किंमत एक कोटी ६९ लाख २६ हजार रुपये इतकी असल्याचे सांगितले जात आहे. याप्रकरणी कारचालक मोहनलाल याच्यावर मुंब्रा पोलिस ठाण्यात गुन्हा दाखल करून त्याला अटक केली आहे. त्याला २३ जुलैपर्यंत पोलिस कोठडी देण्यात आली आहे, अशी माहिती ठाणे शहर पोलिस दलाच्या गुन्हे शाखेचे उपायुक्त अमरसिंह जाधव यांनी पत्रकार परिषदेत दिली.