पदकप्राप्त महिला खेळाडूंसाठी दोन लाखांपर्यंत बक्षिसे

पदकप्राप्त महिला खेळाडूंसाठी दोन लाखांपर्यंत बक्षिसे
महानगरपालिकेकडून अर्थसाहाय्य; आंतरराष्ट्रीय ते राज्य पातळीवरील विजेत्यांना लाभ
नवीन पनवेल, ता. २१ (बातमीदार) ः राज्य व राष्ट्रीय स्तरावर क्रीडा क्षेत्रात विशेष प्रावीण्य मिळविणाऱ्या महिला खेळाडूंसाठी पनवेल महानगरपालिकेच्या महिला व बालकल्याण विभागाकडून दोन लाख रुपयांपर्यंत बक्षिसे दिली जात आहेत. वैयक्तिक व सांघिक गटातील मुलींना त्यांच्या खेळाच्या सरावात खंड पडू नये म्हणून आर्थिक मदत करण्याच्या उद्देशाने ही बक्षिसे देण्यात येतात. आतापर्यंत सात मुलींना त्याचा लाभ झाला आहे. महापालिका हद्दीतील मुलींनी या योजनेचा लाभ घ्यावा, असे आवाहन महिला व बालविकास विभागातर्फे करण्यात येत आहे.
महिला व बालकल्याण विभागांतर्गत कल्याणकारी योजनेद्वारे सुवर्ण, रौप्य आणि कांस्यपदक मिळविणाऱ्या महिलांना अनुक्रमे वैयक्तिक व सांघिक बक्षिसाची रक्कम आंतरराष्ट्रीय स्तर वैयक्तिक पाच, तीन व तीन लाख, सांघिक तीन, दोन व एक लाख, राष्ट्रीय स्तर वैयक्तिक दोन, दीड व एक लाख, सांघिक दीड, एक लाख व ७५ हजार, राज्यस्तर वैयक्तिक ५० हजार, ३५ व २५ हजार, सांघिक ३५ हजार, २५ हजार व २० हजार रुपये आर्थिक मदत मिळते.

असा करावा अर्ज

पात्रताधारक महिला खेळाडूने विहित नमुन्यातील अर्ज महिला व बालकल्याण विभागाकडे आवश्यक कागदपत्रांसह जमा करावा. त्यासाठी वैयक्तिक किंवा सांघिक लाभ घेणारे खेळाडू पनवेल महापालिका हद्दीत शाळेत किंवा महाविद्यालयात शिक्षण घेणारे असावेत. शाळा-महाविद्यालयाचे संमतीपत्र, आधार कार्ड, राष्ट्रीयकृत बँकेच्या पासबुकची सत्यप्रत, नगरसेविकेचे शिफारसपत्र, राष्ट्रीय, राज्य स्तरावर प्रावीण्य मिळविण्याचे खेळाचे प्रमाणपत्र आवश्यक आहे.