अटल सेतूवर मिळणार हायटेक इंटरनेट

अटल सेतूवर मिळणार हायटेक इंटरनेट
पुलाखालून ‘ऑप्टिकल फायबर’
उरण, ता. २१ (वार्ताहर) ः शिवडी-न्हावा शेवा अटल सेतूवर ऑप्टिकल फायबर केबल टाकण्यात येणार आहे. सेतूच्या मुख्य रस्त्याखालून वाहिन्या टाकण्यात येणार असून सागरी किंवा कुठल्याही सेतूवर अशा प्रकारचे ऑप्टिकल फायबर जाळे बसविण्याचा देशातील हा पहिलाच प्रयोग आहे. यामुळे वाहनचालकांसह सेतूवरील सीसीटीव्हीही अधिक कार्यक्षम होतील.
२१.८० किमी लांबी व त्यापैकी १८.१८ किमी लांबी समुद्रावरून असलेला अटल सेतू हा देशातील सर्वाधिक लांबीचा सागरी पूल आहे. विविध आकारातील गर्डर एकमेकांना जोडून तो उभा करण्यात आला आहे. यातील काही गर्डर पोलादी तर काही सिमेंट काँक्रीटचे आहेत. सिमेंट काँक्रीटचे गर्डर बॉक्स पद्धतीचे असल्याने आतून पोकळ आहेत. सेतूवरील पावसाळी पाणी वाहून नेणाऱ्या वाहिन्या, पथदिव्यांसाठी असलेल्‍या वीजवाहिन्या याच पोकळीत बसवण्यात आली आहे. आता ऑप्टिकल फायबरचे केबलही टाकण्यात येणार असून त्यासाठी मुंबई महानगर प्रदेश विकास प्राधिकरणाने (एमएमआरडीए) निविदा काढली आहे.
निविदेंतर्गत कंत्राटदाराला ५९ मिमी जाडीच्या दोन ऑप्टिकल फायबर केबल बसवायच्या आहेत. याआधारे अटल सेतूवरील वाहनचालकांना इंटरनेटची सुविधा देता येणार आहे. वाहनचालकांकडून वापरल्या जाणाऱ्या इंटरनेटच्या माध्यमातून कंत्राटदाराला महसूल मिळेल. तर ‘एमएमआरडीए’ या मोबदल्यात कंत्राटदाराकडून भाडे आकारणार आहे. पाच वर्षांसाठी हा करार असेल. करारानंतर ६० दिवसांत केबल टाकण्याचे काम पूर्ण होणे अपेक्षित आहे.

फायबर केबल्‍सचे फायदे
- कंत्राटाच्या माध्यमातून मिळणारा महसूल अटल सेतूच्या उभारणीपोटी आलेल्या भांडवली खर्चाचा परतावा किंवा सेतूच्या दैनंदिन देखभाल व दुरुस्तीसाठी एमएमआरडीएकडून वापरला जाणार आहे.
- तांत्रिक सुविधांचा वापर करून महसूल मिळवण्याचे हे मॉडेल इतर पायाभूत प्रकल्पांसाठीही दिशादर्शक ठरेल, तसेच स्मार्ट सिटी आणि डिजिटल इंडिया यांसारख्या व्यापक धोरणांना चालना देणारे ठरेल.
...........