योगेश कदम यांनी जाणून घेतल्या अलिबागकरांच्या समस्या

योगेश कदम यांनी जाणून घेतल्या अलिबागकरांच्या समस्या
अलिबाग, ता. २१ (वार्ताहर) ः गृह राज्यमंत्री योगेश कदम यांनी सोमवारी (ता. २१) अलिबागमध्ये भेट देऊन येथील प्रशासकीय कामकाजाची माहिती घेतली. तसेच, नागरिकांच्या विविध समस्या जाणून घेतल्या.
शिवसेना रायगड जिल्हाप्रमुख राजा केणी यांच्या नेतृत्वाखाली पदाधिकाऱ्यांनी व कार्यकर्त्यांनी कदम यांचे स्वागत केले. विविध विकासकामांची माहिती देत, रायगड जिल्ह्यातील समस्यांविषयी राजा केणी यांनी योगेश कदम यांच्याशी सविस्तर चर्चा केली. या दौऱ्यात योगेश कदम यांनी अलिबाग तालुक्यातील प्रशासकीय कामकाजाची माहिती घेतली. महसूल, अन्नपुरवठा, ग्राहक संरक्षण यांसारख्या विभागांशी संबंधित तक्रारी व मागण्या समजून घेतल्या. त्यानंतर त्यांनी अधिकाऱ्यांना जनतेच्या प्रश्नांकडे संवेदनशीलतेने पाहण्याचे निर्देश दिले.
या भेटीत शिवसेना पदाधिकारी, ग्रामपंचायत सदस्य, व्यापारी संघटनांचे प्रतिनिधी आणि ग्रामस्थ मोठ्या संख्येने उपस्थित होते. राजकीय दृष्टिकोनातून ही भेट महत्त्वाची मानली जात असून, रायगड जिल्ह्याच्या विकासासाठी मंत्री कदम यांच्या माध्यमातून नव्या योजनांची अपेक्षा व्यक्त केली जात आहे.