‘वंदे भारत’ला डबेवाढीची प्रतीक्षा

‘वंदे भारत’ला डबेवाढीची प्रतीक्षा
कोकणवासीयांची रेल्वे प्रशासनाकडे नाराजी

सकाळ वृत्तसेवा
मुंबई, ता. २१ : गणेशोत्सव जवळ येत असताना कोकणात प्रवास करणारे हजारो प्रवासी मडगाव वंदे भारत एक्स्प्रेसच्या डब्यांमध्ये वाढ करण्याची प्रतीक्षा करीत आहेत; मात्र रेल्वे प्रशासनाकडून यावर अद्यापही घोषणा करण्यात आली नाही. याउलट नांदेड वंदे भारत २० डब्यांसह धावणार असल्याने कोकणवासीयांमध्ये नाराजीचे वातावरण आहे.
मुंबई ते मडगाव वंदे भारत या आठ डब्यांसह धावणाऱ्या गाडीला नेहमी गर्दी असते. तेजस आणि जनशताब्दी एक्स्प्रेसप्रमाणेच या गाडीचेदेखील डबेवाढीबाबत नियोजन होणे आवश्यक आहे. तेजस आणि जनशताब्दी प्रत्येकी १६ डब्यांसह धावत असताना, सर्वाधिक महसूल मिळवणाऱ्या मडगाव वंदे भारत या गाडीला डबेवाढ न मिळणे हे दुर्दैवी असल्याची भावना प्रवासी व्यक्त करीत आहेत. मध्य रेल्वेच्या हद्दीतून शिर्डी, जालना, सोलापूर आणि मडगाव अशा चार वंदे भारत गाड्या सुरू आहेत. त्यामध्ये नांदेडसाठी नवीन वंदे भारत सुरू करून ती २० डब्यांसह चालविण्याचा निर्णय रेल्वे प्रशासनाने घेतला आहे. हीच गाडी सोलापूर मार्गावरही धावेल; मात्र गणेशोत्सवात सर्वाधिक प्रवासी भार असलेल्या कोकण रेल्वेमार्गासाठी मडगाव वंदे भारतमध्ये डबेवाढ न होणे, हे रेल्वे प्रशासनाचे कोकणावरील दुर्लक्षच असल्याची टीका अखंड कोकण रेल्वे प्रवासी सेवा समितीचे सचिव अक्षय महापदी यांनी केली.