उघड्या चेंबरमध्ये पडून वृद्ध इसमाचा मृत्यू

उघड्या चेंबरमध्ये
पडून वृद्धाचा मृत्यू
एमआयडीसी प्रशासनाच्या निष्काळजीपणाचा बळी
सकाळ वृत्तसेवा
डोंबिवली, ता. २१ : कल्याण पूर्वेकडील टाटा पॉवर नाका परिसरात रस्त्यालगत असलेल्या उघड्या चेंबरमध्ये पडून एका ६० वर्षीय व्‍यक्तीचा मृत्यू झाल्याची धक्कादायक घटना सोमवारी सकाळी घडली. बाबू धर्मा चव्हाण असे मृत व्यक्तीचे नाव आहे. एमआयडीसी प्रशासनाच्या दुर्लक्षामुळे हा बळी गेल्याचा संताप नागरिकांनी व्‍यक्त केला आहे. दरम्यान, याबाबत एमआयडीसीच्या अधिकाऱ्यांशी संपर्क साधला असता त्यांनी कोणताही प्रतिसाद दिला नाही.

टाटा पॉवर नाका परिसरातून सोमवारी दुपारी बाबू चव्हाण हे पायी जात होते. अचानक त्यांचा पाय घसरून ते रस्त्यालगत असलेल्या एमआयडीसीच्या पाण्याच्या उघड्या वॉल चेंबरमध्ये पडले. यात त्यांच्या डोक्याला गंभीर जखम झाली. आजूबाजूच्या नागरिकांनी त्यांना तातडीने चेंबरमधून बाहेर काढून डोंबिवलीतील एका खासगी रुग्णालयात दाखल केले; मात्र उपचारांदरम्यान चव्हाण यांचा मृत्यू झाला. या घटनेमुळे नागरिकांमध्ये तीव्र संताप व्यक्त होत आहे. बाबू चव्हाण यांची मुले काशिनाथ आणि प्रवीण यांनी एमआयडीसी प्रशासनाच्या निष्काळजीपणामुळे ही घटना घडली असल्याचा आरोप केला आहे. स्थानिक नागरिकांनी अनेकदा एमआयडीसीकडे तक्रार करूनही त्याकडे दुर्लक्ष केले. आम्ही आमचे वडील गमावले. अन्य कोणावरही अशी वेळ येऊ नये, अशी भावना त्यांनी व्यक्त केली.
-----
मृतदेह ताब्यात न घेण्याचा इशारा
रुग्णालय परिसरात नागरिकांनी मोठी गर्दी केली होती. जबाबदार अधिकाऱ्यांवर कठोर कारवाई करा. आम्हाला न्याय मिळेपर्यंत मृतदेह ताब्यात घेणार नाही, असा इशारा नागरिकांनी दिला आहे.
हे चेंबर नेमके कोणी उघडे ठेवले, असा सवाल स्थानिक माजी नगरसेवक मोरेश्वर भोईर यांनी केला आहे. यासंदर्भात त्यांनी एमआयडीसी प्रशासनाला खडे बोल सुनावले.