मनसेच्या दणक्याने भाजप आमदाराच्या कार्यालयातील उतरवली गुजराती पाटी

मनसेच्या दणक्याने उतरवली गुजराती पाटी
भाजप आमदाराच्या कार्यालयातील घटना
तुर्भे, ता. २१ (बातमीदार ): गुजरातमधील भाजप आमदार वीरेंद्र जडेजा यांनी सीवूड्समधील भाजप जनसंपर्क कार्यालयाची पाटी गुजरातीमध्ये लावली होती. यामुळे संतापलेल्या मनसेने एनआरआय सागरी पोलिस स्थानकात मोर्चा नेला होता. त्यानंतर पोलिसांच्या साक्षीने वादग्रस्त गुजराती पाटी हटवण्यात आली.
गुजराती पाटीविरोधात मनसे शहर सचिव सचिन कदम, मनसे महिला सेना शहर अध्यक्ष डॉ. आरती धुमाळ, मनसे सीवूड्स विभाग अध्यक्ष अमोल आयवळे, शिवसेना(उबाठा) विभागप्रमुख विशाल विचारे, काँग्रेस अनुसूचित जाती जिल्हा अध्यक्ष रत्नाकर कुदळे, राष्ट्रवादी काँग्रेस(शप गट) भटक्या विमुक्त जाती जिल्हा अध्यक्ष दिलीप चव्हाण यांच्या नेतृत्वाखाली पोलिस स्थानकात मोर्चा धडकला. या वेळी मराठीचा अपमान करणारा भाजप आमदार, कार्यकर्ता यांच्यावर तत्काळ गुन्हा दाखल करावा व गुजराती पाटी हटवून मराठी लावण्याची आक्रमक भूमिका मांडली. या शिष्टमंडळात मनसे शहर सचिव सचिन कदम, मनसे महिला सेना शहर अध्यक्ष डॉ. आरती धुमाळ, मनसे सीवूड्स विभाग अध्यक्ष अमोल आयवळे, शिवसेना(उबाठा) विभागप्रमुख विशाल विचारे आदी उपस्थित होते. शिष्टमंडळाच्या आक्रमक भूमिकेनंतर वरिष्ठ पोलिस निरीक्षक सुनील कदम यांनी वादग्रस्त गुजराती पाटी तत्काळ हटवण्याचे आश्वासन दिले.
त्यानंतर मनसे पदाधिकाऱ्यांनी भाजप जनसंपर्क कार्यालयाकडे मोर्चा वळवला. पोलिसांच्या साक्षीने वादग्रस्त गुजराती पाटी हटवण्यात आली. तसेच भाजप आमदाराच्या कार्यकर्त्याने तमाम मराठी जणांची जाहीर माफी मागितली व काही तासांत मराठी पाटी बसवण्याचे आश्वासन दिले. जर गुजराती पाटी पुन्हा या आमदाराने बसवली, तर यापुढे मनसे स्टाइल धडा शिकवेल, असा इशारा सचिन कदम यांनी दिला.