वांद्रे-कुर्ला संकुलात उभा राहणार महाराष्ट्र पुराभिलेख भवन

वांद्रे-कुर्ला संकुलात उभा राहणार महाराष्ट्र पुराभिलेख भवन

मुंबई, ता. २१ : पर्यटन व सांस्कृतिक कार्य विभागाच्या अखत्यारीतील पुराभिलेख विभागाचे महाराष्ट्र पुराभिलेख भवन वांद्रे-कुर्ला संकुलात उभा राहण्यात येणार आहे. येथील तब्बल आठ हजार २९१ चौरस मीटर जागेवर हे भवन उभारले जाणार असून, त्यासाठी सरकारने विशेष नियोजन प्राधिकरण म्हणून ‘एमएमआरडीए’ला दर्जा दिला आहे. राज्यात भव्य महाराष्ट्र पुराभिलेख भवन उभारण्याचे राज्य सरकारच्या विचाराधीन होते. त्यानुसार सरकारने हे भवन वांद्रा-कुर्ला संकुलातील सर्व्हे नंबर ३४१मधील एकूण ८,२९१.४० चौरस मीटर जागेवर उभारण्याचे निश्चित केले असून, त्याची धुरा एमएमआरडीएच्या खांद्यावर दिली आहे. त्याबाबतचा शासन निर्णय जारी करण्यात आला आहे. या भवनच्या माध्यमातून पुराभिलेख विभाग एका छत्राखाली येणार आहे. दरम्यान, पुराभिलेख संचालनालयाच्या संचालकांनी या कामाबाबत वेळेवेळी एमएमआरडीएसोबत समन्वय साधून राज्य सरकारला माहिती द्यावी, तसेच समन्वय अधिकारी म्हणून काम करावे, असे राज्य सरकारने स्पष्ट केले आहे.