खासगी कॅबचालकांचा आंदोलनाचा इशारा

खासगी कॅबचालकांचा आंदोलनाचा इशारा

सकाळ वृत्तसेवा
मुंबई, ता. २१ : खासगी ओला, उबर आणि रॅपिडो ऑटो-टॅक्सीचालकांनी त्यांच्या विविध मागण्यांकडे सरकारने गांभीर्याने लक्ष दिले नाही, तर येत्या बुधवारी (ता. २३) मुंबई, पुणे आणि नागपूर शहरात चक्का जाम आंदोलन करण्याचा इशारा दिला आहे.
खासगी कॅबचालकांच्या आंदोलनाच्या पार्श्वभूमीवर मंगळवारी (ता. २२) परिवहन विभागाच्या शिष्टमंडळासोबत बैठक होणार आहे. या बैठकीत सकारात्मक निर्णय झाला नाही तर बंद पुन्हा सुरू करण्यात येईल, अशी स्पष्ट भूमिका चालक संघटनांनी घेतली आहे. गेल्या आठवड्यात या चालकांनी एकदिवसीय आंदोलन पुकारले होते; मात्र सरकारच्या मध्यस्थीनंतर मंगळवारपर्यंत आंदोलन स्थगित करण्यात आले. आता मंगळवारी होणाऱ्या चर्चेत जर सरकारने ठोस निर्णय घेतला नाही, तर बुधवारपासून पुन्हा रस्त्यावर उतरू, असा इशारा देण्यात आला आहे. परिवहन विभागाकडून संघटनांच्या चालक प्रतिनिधींना चर्चेसाठी बोलावण्यात आले आहे. मात्र बैठक निष्फळ ठरल्यास मोठ्या प्रमाणावर वाहतूक व्यवस्था विस्कळित होण्याची शक्यता आहे. त्यामुळे प्रशासन आणि नागरिकांचे लक्ष या बैठकीच्या निष्कर्षांकडे लागले आहे.

मागण्या काय आहेत?
प्रति किलोमीटर भाड्यात वाढ करावी
अ‍ॅपवरून घेतले जाणारे कमिशन कमी करावे
महाराष्ट्र अ‍ॅग्रीगेटर धोरण तातडीने लागू करावे
चालक व त्यांच्या कुटुंबासाठी सामाजिक सुरक्षा कवच लागू करावे