एमएमआरमधील ऐतिहासिक स्थळांच्या माहितीची पुस्तिका एमएमआरडीएने साकारली

महामुंबईतील ऐतिहासिक स्थळांवर प्रकाश
एमएमआरडीएकडून विशेष ग्रंथमालेचे प्रकाशन
सकाळ वृत्तसेवा
मुंबई, ता. २१ : मुंबई महानगर प्रदेश विकास प्राधिकरणाने (एमएमआरडीए) नागरिक, अभ्यासक आणि पर्यटकांपर्यंत मुंबई आणि परिसरातील समृद्ध ऐतिहासिक स्थळांची माहिती पोहोचवण्यासाठी महत्त्वपूर्ण पाऊल उचलले आहे. त्यानुसार एमएमआरडीएतर्फे चार भागांची हेरिटेज वारसा जपणारी विशेष ग्रंथमाला तयार केली आहे. त्याचे प्रकाशन आज एमएमआरडीएचे महानगर आयुक्त डॉ. संजय मुखर्जी यांच्या हस्ते करण्यात आले.
एमएमआरडीएच्या सुवर्णमहोत्सवी वर्षात प्रकाशित करण्यात आलेल्या या विशेष ग्रंथमालेला ‘एमएमआर हेरिटेज कन्झर्व्हेशन सोसायटी’चे (एमएमआर-एचसीएस) आर्थिक साह्य लाभले आहे. ही ग्रंथमाला ‘द पीपल प्लेस प्रोजेक्ट’तर्फे प्रकाशित करण्यात आली आहे. त्यामध्ये ‘अ वॉक थ्रू कल्याण-ठाणे’, ‘अ वॉक थ्रू वसई-सोपारा-विरार’, ‘अ वॉक थ्रू मुंबादेवी-डोंगरी’ आणि ‘अ वॉक थ्रू मुंबई सबर्ब्स : बांद्रा अ‍ॅण्ड कोस्टल ट्रेल्स’ या चार पुस्तिकांचा समावेश आहे. यामध्ये निवडक वारसास्थळे असून, त्यांचे सहज समजण्यासारखे नकाशे, पायी फिरण्याचे मार्ग आणि सखोल संदर्भात्मक माहिती देणारे लेख यांचा समावेश आहे. त्यामुळे वारसा अभ्यासक, विद्यार्थी आणि पर्यटक यांच्यासाठी ही ग्रंथमाला उपयुक्त ठरणार आहे.