गुटखाविक्री करणाऱ्याला अटक

भिवंडी, ता. २१ (वार्ताहर) : भिवंडीतील कोनगाव परिसरात पान टपरीवर प्रतिबंधित गुटख्याची विक्री करणाऱ्या एका तरुणाला कोनगाव पोलिसांनी अटक केली आहे. सानेबुल हमेदुल शेख (ता. २०) असे अटक केलेल्या विक्रेत्याचे नाव आहे.
पोलिसांनी दिलेल्या माहितीनुसार, कोनगाव येथील ड्रीम कॉम्प्लेक्स कम्पा‍ऊंडमधील ताहीर पान शॉप या टपरीवर प्रतिबंधित गुटख्याची विक्री होत असल्याची माहिती अन्न व औषध प्रशासनाला मिळाली होती. त्यानुसार अन्न व औषध प्रशासनाच्या अन्न सुरक्षा अधिकारी स्मिता हिरेमठ यांनी या ठिकाणी १८ जुलैला छापा टाकला. त्या ठिकाणी प्रतिबंधित गुटख्याची विक्री होत असल्याचे तपासात उघड झाले. याप्रकरणी शेखविरोधात हिरेमठ यांच्या फिर्यादीवरून कोनगाव पोलिस ठाण्यात गुन्हा दाखल केला आहे. पोलिसांनी त्याला अटक केली असून त्याच्याकडून चार हजार २०६ रुपये किमतीचा प्रतिबंधित पान मसाला व सुगंधित तंबाखू जप्त केला आहे.