ग्रामरोजगार सेवकांचे थकित मानधन न मिळाल्यास ३१ जुलैपासून काम बंद आंदोलनाचा इशारा.

ग्रामरोजगार सेवकांचा काम बंद आंदोलनाचा इशारा
विक्रमगड, ता. २१ (बातमीदार) ः तालुक्यातील ग्रामरोजगार सेवकांचे थकीत असलेले मानधन सात दिवसांत न मिळाल्यास ३१ जुलैपासून काम बंदचा इशारा दिला आहे. याबाबतचे निवेदन नुकतेच ग्रामरोजगार सहाय्यक युनियनकडून गटविकास अधिकारी पंचायत समितीतील मयूर मोगल यांना देण्यात आले.
विक्रमगड तालुक्यात एकूण ८४ ग्रामरोजगार सेवक काम करतात. या सर्व ग्रामरोजगार सहाय्यक यांचे डिसेंबर २०२४ ते जून २०२५ या कालावधीतील मानधन, फरक व इतर भत्ते मिळालेले नाहीत. हे मानधन फरक व भत्ते येत्या सात दिवसांत मिळावे, अशी मागणी त्यांनी केली आहे.
हे मानधन मिळाले नाही तर ३१ जुलैपासून काम बंद आंदोलन करण्यात येईल, असा इशारा ग्रामरोजगार सहाय्यकांकडून देण्यात आला आहे. काम बंद आंदोलनामुळे वैयक्तिक व सार्वजनिक कामावर परिणाम झाल्यास त्यास रोजगार सेवक संघटना जबाबदार राहणार नाही, असा इशारा त्यांनी निवेदनाद्वारे पंचायत समिती विक्रमगड येथे दिला आहे. निवेदन देताना शिष्टमंडळात ग्रामरोजगार सहाय्यक युनियनचे जिल्हाध्यक्ष प्रदीप गावित, तालुकाध्यक्ष भरत बामणे, माजी तालुकाध्यक्ष भिवा हरपाली, माजी तालुकाध्यक्ष संजय पवार, पुंडलिक फुफाणे आदी उपस्थित होते.