किडनी विक्रीच्या नावाने ४५ वर्षांच्या व्यक्तीला गंडा

किडनी विक्रीच्या नावाने ४५ वर्षांच्या व्यक्तीला गंडा
एक कोटी देतो सांगून तीन लाखांची फसवणूक
अंधेरी, ता. २१ (बातमीदार) ः किडनी विक्रीच्या नावाने एका ४५ वर्षीय व्यक्तीला अज्ञात आरोपीने गंडा घातला. किडनीच्या मोबदल्यात एक कोटी रुपये देतो, असे सांगून त्याची तीन लाखांची फसवणूक केली आहे. याप्रकरणी फसवणुकीसह आयटी कलमांतर्गत गुन्हा नोंदवून दहिसर पोलिसांनी तपास सुरू केला आहे.
अंधेरीतील एका खासगी कंपनीत ऑफिस बॉय म्हणून काम करणारा तक्रारदार दहिसर येथे राहतो. घरातील आर्थिक अडचणीमुळे त्याचा किडनी विक्रीचा प्रयत्न होता. सोशल साईटवर त्याला नवी दिल्लीतील एका रुग्णालयाच्या माहितीसह मोबाईल क्रमांक मिळाला. तिथे संपर्क साधला असता समोरील व्यक्तीने किडनी विक्रीतून त्याला एक कोटी रुपये देण्याचे आश्वासन दिले. किडनी विक्रीसाठी रुग्णालयाची काही प्रोसेस असल्याचे सांगून त्याला तीन लाख रुपये जमा करण्यास सांगितले. त्याच्यावर विश्वास ठेवून त्याने तीन लाख रुपये जमा केले. संबंधित व्यक्तीने दिलेल्या बँक खात्यात ही रक्कम पाठवली. मात्र बरेच दिवस उलटूनही या व्यक्तीने त्याला संपर्क साधला नाही. उलट तो त्याच्याकडून आणखीन पैशांची मागणी करीत होता. हा प्रकार संशयास्पद वाटताच त्याने रुग्णालयाची माहिती जाणून घेण्याचा प्रयत्न केला. त्यात त्याला संबंधित रुग्णालय दिल्लीत नसून पुण्यात असल्याचे समजले. अज्ञात आरोपीकडून फसवणूक झाल्याचे लक्षात येताच त्याने घडलेला प्रकार दहिसर पोलिसांना सांगून तक्रार केली. या तक्रारीची शहानिशा केल्यानंतर संबंधित सायबर ठगाविरुद्ध पोलिसांनी फसवणुकीसह आयटी कलमांतर्गत गुन्हा दाखल केला.