खारघरमध्ये तीन हजार चालकांवर कारवाई

खारघर, ता. २२ (बातमीदार) : वाहतुकीच्या नियमांचे उल्लंघन करणाऱ्या चालकांवर खारघर वाहतूक शाखेने कारवाईचा बडगा उगारला आहे. १ ते २० जुलै या अवघ्या २० दिवसांत तीन हजार बेशिस्त वाहनचालकांकडून हजारोंचा दंड वसूल केला आहे, तर गेल्‍या १० महिन्यांत १० लाखांचा दंड वसूल करण्यात आला आहे.
खारघर शहरात लोकसंख्येबरोबरच वाहनांची संख्याही वाढली आहे. वाहतुकीला शिस्त लागण्यासाठी तसेच अपघात रोखण्यासाठी खारघर वाहतूक शाखेने कारवाईची मोहीम हाती घेतली आहे. यात १ जानेवारी ते २५ एप्रिलदरम्यान राबवण्यात आलेल्या मोहिमेत वाहतूक नियमांचे उल्‍लंघन करणाऱ्या १२ हजार वाहनचालकांवर दंडात्मक कारवाई करून १० लाख ४८ हजार रुपये दंड वसूल करण्यात आला होते, तर २० दिवसांत वाहन चालविताना मोबाईल फोनवर बोलणे, सिग्नल तोडणे, दुचाकीवरून तिघांनी प्रवास करणे, विनाहेल्मेट, सुरक्षा बेल्ट परिधान न करणे तसेच मुख्य रस्‍ते, चौकात वाहने उभी करून वाहतुकीस अडथळा निर्माण करणे अशा तीन हजार बेशिस्त चालकांवर कारवाई करत हजारो रुपयांचा दंड वसूल केला आहे.

रिक्षाचालकांच्या मनमानीला लगाम
खारघर परिसरात तीन हजारांहून अधिक रिक्षा धावतात. दरम्यान, खारघर रेल्वेस्थानकावर बेशिस्तपणे रिक्षा उभी करून प्रवाशांना अडथळा निर्माण करणे, त्‍यांच्याशी वाद घालणे आदी प्रकाराला आळा घालण्यासाठी खारघर वाहतूक पोलिसांनी कारवाई केली. त्‍यामुळे रिक्षाचालकांच्या मनमानीला लगाम बसला आहे.

दंडवसुली करताना वाहतूक कोंडीकडे लक्ष द्या -
खारघरमधील उत्सव चौक ते बेलपाडादरम्यानचा रस्‍त्‍यावर दुतर्फा गॅरेज व्यावसायिकांनी ठाण मांडले आहे. डेली बाजारकडून शिल्प चौक आणि गोखले शाळेकडे जाणाऱ्या रस्त्याच्या दोन्ही बाजूला चालक वाहने उभी करीत असल्यामुळे वाहतूक कोंडीत भर पडत आहे. वाहतूक पोलिसांनी चालकांकडून दंडवसुली करताना वाहतूक कोंडीकडे लक्ष द्यावे, अशी मागणी खारघर वाशियांकडून केली जात आहे.

काही वर्षात वाहन अपघाताच्या संख्येत वाढ होत आहे. चालकाने वाहतुकीच्या नियमांचे पालन करावे यासाठी वाहतूक विभाग प्रयत्नशील आहे. खारघरच्या वाढत्या लोकसंख्येत वाहनांचीही भर पडत आहे. चालकांनी नियमांचे पालन करून वाहतूक विभागाला सहकार्य करावे.
- तिरुपती काकडे, उपायुक्त, वाहतूक विभाग नवी मुंबई