वाशी गावात शेतकऱ्यांचा गॅसवाहिनीला विरोध

पेण, ता. २२ (वार्ताहर) : तालुक्यातील वाशी गावामधून जात असलेल्या गॅसवाहिनी प्रकल्पाकरिता सोमवारी (ता.२१) मोजणी करण्यासाठी अधिकारी दाखल झाले होते. मात्र शेतकऱ्यांनी प्रखर विरोध केल्‍याने त्‍यांना मोजणी न करताच परतावे लागले.
१३ गावांतील शेतकऱ्यांनी एकत्र येत, सुपीक जमिनीवरून ज्वलनशील गॅसवाहिनी टाकण्याविरोधात आवाज उठवला आहे. आमच्या शेतजमिनी कोणत्याही मोबदल्यावर प्रकल्पास देणार नाहीत, प्रोफेन गॅस हा अतिज्वलनशील असून शेताच्या मधोमध ती टाकण्यात येत असल्‍याने शेती उद्ध्वस्त होण्याची शक्‍यता आहे. पर्यायी मार्ग उपलब्ध असूनही पिकत्‍या जमिनीवरून गॅसवाहिनी टाकणे चुकीचे असल्‍याने संतप्त शेतकऱ्यांनी मोजणीसाठी आलेल्‍या अधिकाऱ्यांना प्रखर विरोध केला. त्‍यामुळे त्‍यांनी आल्‍या पावली परतावे लागले. या वेळी २४ गाव विरोधी कृती संघर्ष समिती अध्यक्ष काशिनाथ पाटील, राजन झेमसे, वाशी सरपंच संदेश ठाकूर, माजी सरपंच गोरख पाटील, मेघा म्हात्रे, नरेश मोकल, प्रकाश ठाकूर, अनंत पाटील, हेमंत पाटील आदी शेतकरी वर्ग तसेच संबंधित प्रकल्पाचे अधिकारी उपस्थित होते. कोणताही अनुचित प्रकार घडू नये, याकरिता वडखळ पोलिस निरीक्षक प्रसाद पांढरे यांच्या मार्गदर्शनाखाली मोठा पोलिस बंदोबस्त ठेवण्यात आला होता.

गॅसवाहिनी समुद्र, खाडीकिनारी जागेतून टाकण्यात यावी. या मागणीवर शेतकरी ठाम असून त्‍यासाठी आमची कोणतीही हरकत असून अधिकाऱ्यांनी त्‍यानुसार नियोजन करावे. शेतजमिनीतून गॅसवाहिनी टाकण्याला आमचा तीव्र विरोध आहे.
- काशिनाथ पाटील, अध्यक्ष, २४ गाव विरोधी कृती संघर्ष समिती