आंग्रु डुंग्रू कार्यक्रमातून आगरी बोलीच्या वैभवाला उजाळा

आंग्रू डुंग्रू कार्यक्रमातून आगरी बोलीच्या वैभवाला उजाळा
नवी मुंबई, ता. २२ (वार्ताहर) : भूमिपुत्र सामाजिक प्रतिष्ठान, नवी मुंबई यांच्या वतीने आग्रोळी येथील बी. टी. रणदिवे ग्रंथालयात शनिवारी (ता. १९) आंग्रू डुंग्रू हा आगरी बोलीचे वैभव सांगणाऱ्या विशेष कार्यक्रमाचे आयोजन केले होते.
या वेळी व्यासपीठावर कवयित्री मीनाक्षी तांडेल, स्मिता वाजेकर, धवला गायिका संगीता पाटील आणि लेखक-कवी गज आनन म्हात्रे उपस्थित होते. कार्यक्रमाच्या अध्यक्षस्थानी राजेश पाटील (आग्रोळी) होते. याशिवाय बी. टी. रणदिवे कमिटीचे सदस्य, आग्रोळी ग्रामस्थ, कवी व साहित्यिक मोठ्या संख्येने उपस्थित होते.
या कार्यक्रमात ज्ञानेश्वरीतील आगरी शब्द, आगरी म्हणी, धवला व लग्नगीते, आगरी बोलीतील गोष्ट, कविता आणि किस्से रसिकांसमोर सादर करण्यात आले. यामुळे पारंपरिक आगरी सांस्कृतिक वारशाची जिवंत झलक रसिकांना अनुभवता आली. या वेळी उपस्थित १० कवींनी त्यांच्या आगरी बोलीतील कविता सादर करून कार्यक्रमात रंग भरले. या वेळी समाजसेवक नारायण मुकादम, नाट्यलेखक अनिल मुनघाटे आणि रणदिवे ग्रंथालयाचे विश्वस्त राजेश पाटील आदी उपस्थित होते. अशा कार्यक्रमांमुळे स्थानिक बोली आणि संस्कृती टिकून राहते, असे मत मान्यवरांनी व्यक्त केले. या कार्यक्रमाची संकल्पना विशद करीत लेखक-कवी गज आनन म्हात्रे सूत्रसंचालन यांनी केले.