लेनाड नदीवरील पूल धोकादायक

लेनाड नदीवरील पूल धोकादायक
संरक्षक कठडे निखळले; रस्ता खड्डेमय
शहापूर, ता. २२ (वार्ताहर) : तालुक्यातील लेनाड गावाजवळील नदीवरील पूल अत्यंत धोकादायक स्थितीत असून, या पुलावरून प्रवास करणे वाहनचालकांसाठी जीवघेणे ठरत आहे. पुलावरील संरक्षक कठडे निखळले असून, रस्त्यावरील मोठमोठे खड्डे अपघाताला निमंत्रण देत आहेत. शहापूर–मुरबाड–खोपोली महामार्ग घोषित झाल्यापासून या पुलाची जबाबदारी महाराष्ट्र राज्य रस्ते विकास महामंडळाकडे देण्यात आली आहे; मात्र महामार्गाचे काम रखडल्यामुळे पुलाचे नूतनीकरणही थांबले आहे.

लेनाड नदीवरील पूल १०० वर्षांहून अधिक जुना असून, गेल्या काही वर्षांत केवळ रस्त्यावर डांबरीकरण करण्यात आले आहे. याशिवाय कोणतीही देखभाल किंवा दुरुस्ती न झाल्यामुळे पुलाची अवस्था दयनीय झाली आहे. पुलावर कठडे नसल्याने अंधारात किंवा पावसाळ्यात वाहनांचा तोल जाऊन अपघात होण्याचा धोका वाढला आहे. स्थानिक नागरिक आणि वाहनचालक रोजच्या धोकादायक प्रवासामुळे नाराजी व्यक्त करत असून, प्रशासनाने या पुलाचे तत्काळ नूतनीकरण करावे, अशी जोरदार मागणी केली आहे.