पनवेल आगारातील आषाढवारी लाखमोलाची

पनवेल आगारातील आषाढी वारी लाखमोलाची
महामंडळाच्या तिजोरीत ११ लाख जमा; ३४ विशेष बसमधून ३९७७ वारकऱ्यांची यात्रा
पनवेल, ता. २२ (बातमीदार) ः आषाढी एकादशीनिमित्त पंढरपूरकडे जाणाऱ्या वारकऱ्यांसाठी एसटी महामंडळाने विशेष वाहतूक सेवा उपलब्ध करून दिली होती. पनवेल आगारातूनही यादरम्‍यान ३४ विशेष एसटी बस सुरू करण्यात आल्‍या होत्‍या. या माध्यमातून तीन हजार ९७७ वारकऱ्यांनी विठूरायाचे दर्शन घेण्यासाठी पंढरपूरची वारी केली. त्‍यामुळे महामंडळाच्या तिजोरीत तब्बल १० लाख ९६ हजार ९८१ रुपयांचे उत्पन्न जमा झाल्‍याची माहिती आगार व्यवस्थापक ज्ञानेश्वर म्हात्रे यांनी दिली.
पनवेल तालुक्यातून वारकरी भाविकांची गैरसोय होऊ नये, याकरिता एसटी महामंडळाने खास नियोजन करून वारकऱ्यांसाठी जादा बस फेरीचे आयोजन केले होते. यात ३४ विशेष बस सोडण्यात आल्या. त्याचप्रमाणे यात्रेनंतर परतीच्या प्रवासासाठीही पंढरपूरहून पनवेलकडे येणाऱ्या बसची स्वतंत्र व्यवस्था करण्यात आली होती. या विशेष बसद्वारे पनवेल तालुक्यातून सुमारे ३९७७ भाविकांनी पंढरपूरची वारी पूर्ण केली.

ऑनलाइन आरक्षणाला अनेकांना लाभ
गतवर्षीच्या तुलनेत यंदा पंढरपूरकडे जाणाऱ्या भाविकांची संख्या वाढली होती. ‘प्रवाशांच्या सेवेसाठी’ हे ब्रीद घेऊन धावणाऱ्या एसटीने यंदा वारकऱ्यांना सुटसुटीत आणि सुरक्षित प्रवासाची अनुभूती दिली. वारकऱ्यांची वाढती संख्या आणि बसची चोख सेवा यामुळे पनवेल आगाराला यंदा सुमारे १०.९६ लाख रुपयांचे उत्पन्न मिळाले. ही वारी एसटी महामंडळासाठी आर्थिकदृष्ट्याही लाभदायक ठरली आहे. महामंडळातर्फे पंढरपूर वारीसाठी यंदा ऑनलाइन आरक्षण सेवा उपलब्ध करून देण्यात आल्‍याने अनेकांनी घरबसल्या तिकीट नोंदणी करत आरामदायी प्रवासाचा आनंद घेतला.