राष्ट्रवादी प्रदेशाध्यक्षांच्या पहिल्याच मेळाव्यात जिल्हाध्यक्षांचा राजीनामा

राष्ट्रवादी प्रदेशाध्यक्षांच्या पहिल्याच मेळाव्यात जिल्हाध्यक्षांचा राजीनामा
शशिकांत शिंदे यांच्या सत्कार मेळाव्यात चंद्रकांत पाटलांची घोषणा
तुर्भे, ता. २१ (बातमीदार ) : राष्ट्रवादी काँग्रेस पक्ष (शरद पवार गट)च्या निवनियुक्त प्रदेशाध्यक्षपदी विधान परिषदेचे आमदार शशिकांत शिंदे यांची नुकतीच निवड झाली आहे. या निवडीनंतर नवी मुंबईत कोपरखैरणे येथे त्यांचा सत्कार आणि मेळाव्याचे आयोजन करण्यात आले होते. या मेळाव्यात नवी मुंबई जिल्हाध्यक्ष चंद्रकांत पाटील यांनी राजीनामा देत असल्याचे जाहीर केले आणि एकच खळबळ उडाली.
विधानसभा निवडणुकीपासून राजीनाम्याचा विषय सुरू होता. जिल्हाध्यक्ष चंद्रकांत पाटील यांनी बेलापूर विधानसभेचे तिकीट पक्षाकडे मागितले होते, मात्र पक्षाने भाजपचा राजीनामा देऊन राष्ट्रवादीमध्ये आलेल्या माजी आमदार संदीप नाईक यांना तिकीट दिले. त्यामुळे नाराजीचा सूर होता, मात्र प्रत्यक्षात ही नाराजी नेत्यांसमोर न मांडता चंद्रकांत पाटील हे पक्षाचे काम करत होते. विशेष म्हणजे नवे प्रदेशाध्यक्ष आमदार शशिकांत शिंदे महाराष्ट्र राज्य माथाडी ट्रान्सपोर्ट आणि जनरल कामगार युनियनचे कार्याध्यक्ष असून, त्यांच्यासोबत पाटील संयुक्त सरचिटणीस म्हणून संघटनेत आहेत.

पक्षात राहूनच काम करेल
प्रत्यक्षात राष्ट्रवादीचा एक मोर्चा झाल्यानंतर ३१ जुलैला प्रत्यक्षात राजीनामा देईल, मात्र पक्षात राहूनच काम करेल. मी कुठल्याही पक्षात जाणार नसल्याचे चंद्रकांत पाटील यांनी सांगितले.

...तर कोणालाही ऐकत नाहीत
लोक म्हणतील शशिकांत शिंदे अध्यक्ष झाला आणि भाऊ लगेच राजीनामा देतो. लढण्याच्या वेळेला भावाने भावाच्या खांद्याला खांदा लावून लढले पाहिजे. चंद्रकांत पाटील स्पष्ट बोलणारे आहेत. पटलं तर आणि नाही पटलं तर कोणालाही ऐकत नाहीत, असे शशिकांत शिंदे यांनी म्हटले आहे.