वरई उड्डाणपुलालगत मृतदेह सापडला

मनोर (बातमीदार) : मुंबई-अहमदाबाद महामार्गावरील वरई उड्डाणपुलाच्या सेवा रस्त्यालगत एका अनोळखी व्यक्तीचा मृतदेह आढळून आला. सोमवारी (ता. २१) सकाळी साडेसात वाजण्याच्या सुमारास मृतदेह आढळून आला. मनोर पोलिसांनी मृतदेह ताब्यात घेतला असून अपघाती मृत्यूची नोंद करण्यात आली आहे. पोलिसांकडून मृतदेहाची ओळख पटवण्याचे काम सुरू करण्यात आले आहे. सेवा रस्त्याच्या कडेला जखमी अवस्थेत एक अनोळखी व्यक्ती असल्याची माहिती वरईच्या पोलिस पाटलांनी मनोर पोलिसांना दिली होती. घटनास्थळी पोहोचलेल्या मनोर पोलिस ठाण्याच्या कर्मचाऱ्यांनी त्याला उपचारासाठी मनोरच्या ग्रामीण रुग्णालयात दाखल केले असता डॉक्टरांनी त्याला मृत घोषित केले. या व्यक्तीला दोन दिवसांपूर्वी महामार्गालगत चालत असताना ढेकाळे येथे एका ग्रामस्थाने पाहिल्याची माहिती समोर आली आहे.