पुरामुळे कोसळलेल्या साकावच्या कामाला अखेर सुरुवात

पुरामुळे कोसळलेल्या साकावच्या कामाला अखेर सुरुवात
संपर्क तुटल्याने ग्रामस्‍थांची गैरसोय; पाटबंधारे विभागाने घेतली दखल
रोहा, ता. २२ (बातमीदार) ः रोहे तालुक्यात १४ व १५ जुलै रोजी ढगफुटीसदृश पाऊस पडल्याने डोंगरमाथ्यावरून आलेल्या पाण्यात देवकान्हे, धानकान्हे हद्दीतील कालव्यावरील साकव पूल उद्ध्वस्त होऊन वाहून गेला. या घटनेमुळे कालव्याच्या पलीकडे राहात असलेल्या नागरिकांची गैरसोय झाली. हा पूल तातडीने बांधून देण्याची मागणी येथील नागरिकांनी केली होती. पाटबंधारे विभागाने या घटनेची गांभीर्याने दखल घेऊन तातडीने पूल दुरुस्तीच्या कामाला सुरुवात केली आहे. त्याचप्रमाणे कालव्यातील गाळ उपासाचे कामदेखील युद्धपातळीवर सुरू आहे.
मागील आठवड्यात कोलाड परिसरात पडलेल्या मुसळधार पावसात अनेक गावांना पाण्याने वेढा घातला होता, तर काही गावांमध्ये पूरस्थिती निर्माण झाली होती. येथील कालवे तुडुंब भरून वाहत होते. देवकान्हे आणि धानकान्हे भागातील कालव्यावरील साकव पुरामुळे वाहून गेल्याने येथील वाडी-वस्तीवर राहणाऱ्या ग्रामस्थांचा संपर्क तुटला होता. या घटनेला अनेक दिवस झाले असून, पूलअभावी येथील आदिवासी बांधवांचा मुख्य रहदारीचा मार्गच बंद झाला होता. त्‍यामुळे आदिवासी समाजबांधवांचा मोलमजुरीचा प्रश्न निर्माण झाला होता. या घटनेचे वृत्त आज सकाळमध्ये प्रसिद्ध होताच, पाटबंधारे खाते खडबडून जागे झाले आणि कोसळलेल्या पुलाच्या दुरुस्तीचे काम युद्ध पातळीवर सुरू केले. तसेच कालव्यात जमा झालेला गाळ जेसीबीच्या साह्याने काढण्याचे काम सुरू झाल्याने ग्रामस्थांची चिंता दूर झाली आहे.