असंघटित कामगारांचा समान‌ काम समान दामचा लढा पुढे न्यावा लागेल

‘असंघटित कामगारांचा समान‌ काम समान दामचा लढा पुढे न्यावा लागेल’
सचिन अहिर यांची कामगार मेळाव्यात ग्वाही

शिवडी, ता. २२ (बातमीदार) ः आज केवळ तीन टक्के कामगार संघटित आहेत, तर ९७ टक्के कामगार असंघटित आहेत. त्यात अधिकांश कंत्राटी कामगार आहेत. त्यांना ग्रॅच्युइटी, भविष्य निर्वाह निधी यांसारख्या सेवा‌ लागू नाहीत. त्यांना किमान वेतनही धड मिळत नाही, त्यांच्यासाठी आता समान काम समान वेतन या मागणीचा लढा घेऊन पुढे जावा लागेल, अशी ग्वाही महाराष्ट्र राज्य राष्ट्रीय कामगार संघाचे अध्यक्ष आमदार सचिन अहिर यांनी दिली. ते कामगार मेळाव्यात बोलत होते.
राज्य राष्ट्रीय कामगार संघाच्या दोन दिवसीय अधिवेशन पुण्यात रविवार (ता. २०)पार पडले. या मेळव्याच्या अध्यक्षस्थानी संघटनेचे अध्यक्ष सचिन अहिर होते. याचे उद्‍घाटन विभागीय शिवसेनेचे (ठाकरे गट) आमदार बाबाजी काळे यांच्या हस्ते झाले.
सचिन अहिर म्हणाले की, उद्योग टिकला तर कामगार जगेल आणि कामगार जगला तर युनियन पुढे जाईल, हे तत्व घेऊन आम्ही पुढे चाललो आहोत. पण, आज संघटना वाढविण्यापेक्षा ती टिकविणे अधिक कसोटीचे ठरले आहे‌. केंद्र सरकारने लागू केलेल्या नवीन चार कामगार संहिता आणि राज्य सरकारने हुकुमशाही पध्दतीने जनसुरक्षा कायद्याचे उंचललेले पाऊल कामगार वर्गाला घातक ठरणारे आहे, असे सांगून सचिन अहिर यांनी याविरुद्ध संघटितपणे लढावे‌ लागेल, असे आवाहन केले.

कार्यकारीणीतील ठराव
१) जन सुरक्षा विधेयक मागे घ्या.
२) ग्रॅज्युईटी कायद्यात बदल करा.
३) कंत्राटी कायद्यात सुधारणा करा.
४) कामगारांसाठी कुटुंब कल्याण योजना राबवा.
५) युनियनमध्ये महिला आरक्षण अवलंबण्यात यावे‌.
यावेळी सुनिल (लाली) अहिर, इश्वर वाघ, उत्तम गिते, मिलिंद तांबडे, संदेश कदम, किशोर रहाटे आदीं‌‌ पदाधिकाऱ्यांनी ठराव मांडले. तर कार्यकारीणीत निवृत्ती देसाई, राजन लाड, जी.बी.गावडे, बजरंग चव्हाण, सुनिल बोरकर, शिवाजी काळे, अवधेश पांडे, साई‌ निकम, विश्वनाथ सावंत, ॲड. नितीन पाटील, बाळा सावर्डेकर, दीपक यादव, संतोष बैलमारे, ऐश्वर्या सचिन‌ अहीर‌ आदींची ठरावावर भाषणे झाली. तसेच अधिवेशनात ओला-उबेरचे ज्वलंत प्रश्न, कामगार करार प्रशिक्षण, सामाजिक चळवळ आदी बाबींवर चर्चा झाली.