लाचखोरीप्रकरणी उपनिरीक्षकास अटक

पनवेल, ता. २२ (वार्ताहर) : रायगड लाचलुचपत प्रतिबंधक विभागाच्या पथकाने सोमवारी (ता. २१) सापळा लावून पनवेल शहर पोलिस ठाण्यात कार्यरत उपनिरीक्षक सचिन वामनराव वायकर (४२) याला ५० हजार रुपयांची लाच स्वीकारताना रंगेहाथ पकडले. कारवाईत त्याच्यासोबत खासगी व्यक्ती रवींद्र ऊर्फ सचिन सुभाष बुट्टे (३०) याला अटक करण्यात आली आहे.
तक्रारदाराच्या वडिलांवर पनवेल शहर पोलिस ठाण्यात गुन्हा दाखल करण्यात आला होता. या प्रकरणात अंतरिम जामीन मिळाल्यानंतर उपनिरीक्षक सचिन वायकर यांनी कलम वाढवून तक्रारदाराच्या वडिलांना पुन्हा अटक करण्याची धमकी दिली होती. तसेच तक्रारदाराकडे एक लाख रुपयांची लाच मागितली होती.
तक्रारदाराने लाच न देण्याचा निर्णय घेत रायगड लाचलुचपत प्रतिबंधक विभागाकडे तक्रार दाखल केली होती. तक्रारीची पडताळणी करताना वायकर यांनी, तडजोडीअंती ५० हजार रुपयांची लाच मागितल्याचे निष्पन्न झाले. त्यानुसार सोमवारी पोलिसांच्या पथकाने सापळा लावला होता. या वेळी रवींद्र बुट्टे याने वायकर यांच्या सांगण्यावरून तक्रारदाराकडून ५० हजारांची रक्कम स्वीकारल्यानंतर एसीबीच्या पथकाने दोघांना रंगेहाथ पकडले. रायगड लाचलुचपत प्रतिबंधक विभागाच्या पोलिस उपअधीक्षक सरिता भोसले यांच्या नेतृत्वाखाली निरीक्षक निशांत धनवडे, नारायण सरोदे, सहाय्यक फौजदार विनोद जाधव, हवालदार महेश पाटील, शिपाई नवदीप नांदगावकर आदींच्या पथकाने ही कारवाई केली.
.....