रुग्णालयामधील तीन कर्मचाऱ्यांचा ३२ लाखांवर डल्ला

रुग्णालयामधील तीन कर्मचाऱ्यांचा ३२ लाखांवर डल्ला
रुग्णांना रिफंड देण्यात येणारी रक्‍कम परस्‍पर पळवली
नवी मुंबई, ता. २२ (वार्ताहर) : नेरूळ सेक्टर-२२ येथील तेरणा हॉस्‍पिटल अँड रिसर्च सेंटरमध्ये काम करणाऱ्या तीन कर्मचाऱ्यांनी रुग्णांना रिफंड देण्यात येणाऱ्या तब्बल ३२ लाख रुपयांवर डल्ला मारून रकमेचा अपहार केल्याचे उघडकीस आले आहे. नेरूळ पोलिसांनी या प्रकरणातील तिन्‍ही कर्मचाऱ्यांविरोधात फसवणुकीसह अपहाराचा गुन्हा दाखल करून त्यांना ताब्यात घेतले आहे. तसेच त्यांच्यावर पुढील कारवाई सुरू केली आहे.
या प्रकरणात ताब्यात घेण्यात आलेल्या कर्मचाऱ्यांमध्ये रोहन ठाकूर (वय ३५), प्रणय प्रमोद पाटील (वय ३५) आणि बाळासाहेब सैंदाणे (वय ३४) या तिघांचा समावेश आहे. हे तिघेही नेरूळ सेक्टर-२२ येथील तेरणा हॉस्‍पिटल अँड रिसर्च सेंटरमध्ये बिलिंग विभागात काम करत होते. जुलै २०२४ मध्ये रुग्णाला देय असलेला रिफंड, सिस्टिममध्ये पूर्ण झाल्याची नोंद असताना प्रत्यक्षात ती रक्कम संबंधित रुग्णाला मिळाली नसल्याची तक्रार बिलिंग विभागाचे प्रमुख समीर कोळी यांना मिळाली होती. रुग्णांना पैसे परत केल्याची कागदपत्रे उपलब्ध नसल्यामुळे त्यांनी सीसीटीव्ही फुटेजची तपासणी केली, मात्र त्यात कोणी पैसे रिफंड घेतल्याचे दिसून आले नाही. त्यामुळे संशयावरून हॉस्‍पिटलमधील फायनान्स विभागाला ऑडिट करण्यास सांगण्यात आले. फायनान्स विभागाने केलेल्या ऑडिटनंतर २०२२ ते जुलै २०२४ या कालावधीत एकूण ३२ लाख ३१ हजार इतकी रिफंड म्हणून दाखवलेली रक्कम प्रत्यक्षात रुग्णांना दिली नसल्याचे आढळून आले. ही रक्कम बिलिंग विभागातील तीन कर्मचाऱ्यांनी घेतल्याचे प्राथमिक चौकशीत आढळून आले. त्यामुळे रुग्णालयातील डायरेक्टर व इतर पदाधिकाऱ्यांची चौकशी समिती स्थापन करण्यात आली. या समितीने ऑगस्ट २०२४ मध्ये आपला अहवाल सादर केला.
.....................
कर्मचारी सेवेतून निलंबित
या समितीसमोर रोहन ठाकूर याने १४ लाख ४० हजार रुपये, प्रणय प्रमोद पाटील याने ११ लाख ५५ हजार रुपये, तर बाळासाहेब सैंदाणे याने सहा लाख १६ हजार अशी एकूण ३२ लाखांची रिफंडची रक्कम स्वत: घेतल्याची कबुली दिली आहे. त्यानंतर या तिघांनाही तेरणा हॉस्पिटलच्या सेवेतून निलंबित करण्यात आले. या तिन्ही कर्मचाऱ्यांनी रुग्णांच्या रिफंडची रक्कम स्वत:साठी घेऊन हॉस्पिटलची आर्थिक फसवणूक केल्याने मेडिकल डायरेक्टर डॉ. अपर्णा मेथिल यांनी नेरूळ पोलिस ठाण्यात तक्रार दाखल केली. त्यानुसार पोलिसांनी या तिघांविरोधात गुन्हा दाखल करून त्यांच्यावर पुढील कारवाई सुरू केली आहे.