हत्याप्रकरणातील फरार आरोपीला अटक

अंधेरी, ता. २२ ः हत्या प्रकरणात चार महिन्यांपासून फरार असलेल्या लुकमान ऊर्फ शाहरुख इस्लाम खानला दिंडोशी पोलिसांनी अटक केली आहे. चंद्रशेखर चौहान (३५) यांची प्रेमप्रकरणात अडथळा ठरत असल्याने हत्या करण्यात आली होती.
चंद्रशेखरच्या पत्नी रंजू ऊर्फ रंजना आणि शाहरुख यांच्यात प्रेमसंबंध होते, पण अडथळा ठरत असल्याने १५ मार्च २०२५ रोजी घरात घुसून चंद्रशेखरची हत्या केली. स्थानिक रहिवाशांनी माहिती दिल्यानंतर पोलिस घटनास्थळी दाखल झाले. शवविच्छेदनात चंद्रशेखरची गळा दाबून हत्या झाल्याचे निष्पन्न झाले. रंजू आणि मैनूद्दीनला तत्काळ अटक करण्यात आली होती, तर शाहरुख आणि शिवदास फरार होते. अखेर शाहरुखलाही पोलिसांनी अटक केली असून, त्याने गुन्ह्याची कबुली दिली. न्यायालयाने त्याला पोलिस कोठडी सुनावली आहे.