शिरवणे येथील लॉजवर पोलिसांचा छापा

शिरवणे येथील लॉजवर पोलिसांचा छापा
नवी मुंबई, ता. २२ (वार्ताहर) : नवी मुंबई पोलिसांच्या अनैतिक मानवी वाहतूक प्रतिबंधक कक्षाने गत शनिवारी रात्री नेरूळमधील शिरवणे भागात असलेल्या सुभोदया लॉजिंग ॲन्ड बोर्डिंगवर छापा मारून वेश्याव्यवसाय चालवणाऱ्या लॉजच्या मॅनेजरसह तिघांना ताब्यात घेतले आहे. या कारवाईत पोलिसांनी वेश्याव्‍यवसायासाठी लॉजमध्ये आणलेल्या दोन महिलांची सुटका केली आहे. पोलिसांनी लॉजचा चालक तसेच मुली पुरवणाऱ्या दलालाचा शोध सुरू केला आहे.
नेरूळ येथील शिरवणे भागातील सुभोदया लॉजिंग ॲण्ड बोर्डिंगमधील मॅनेजर लॉजमध्ये येणाऱ्या ग्राहकांना तीन हजार रुपये घेऊन महिला पुरवित असल्याची माहिती अनैतिक मानवी वाहतूक प्रतिबंधक कक्षाला मिळाली होती. त्यानुसार वरिष्ठ पोलिस निरीक्षक पृथ्वीराज घोरपडे, सहाय्यक पोलिस निरीक्षक योगेश देशमुख, पोलिस उपनिरीक्षक सरीता गुडे व त्यांच्या पथकाने गत शनिवारी रात्री सुभोदया लॉजिंग ॲन्ड बोर्डिंगमध्ये बनावट ग्राहकाला पाठवून खात्री केली. त्यानंतर पोलिसांनी रात्री पावणेदहा वाजण्याच्या सुमारास लॉजवर छापा मारला असता, लॉजमध्ये वेश्याव्यवसायासाठी दोन मुली बोलावण्यात आल्याचे आढळून आले. त्यानंतर अनैतिक मानवी वाहतूक प्रतिबंधक कक्षाने लॉजचा मॅनेजर संजीतकुमार यादव, विनोदकुमार चव्हाण व कॅशिअर अक्षय सातपुते या तिघांसह लॉजचा चालक कुमार गौडा, तसेच मुली पुरवणारा दलाल मुकुंद या सर्वांविरोधात नेरूळ पोलिस ठाण्यात अनैतिक व्यापार प्रतिबंधक कायद्यानुसार गुन्हा दाखल करून त्यापैकी तिघांना अटक केली आहे. या कारवाईत दोन महिलांची सुटका करण्यात आली आहे. या कारवाईदरम्यान लॉजच्या मॅनेजरने बाथरूममधून उडी मारून पळून जाण्याचा प्रयत्न केला, मात्र अनैतिक मानवी वाहतूक प्रतिबंधक कक्षाने त्याला पकडले.