खारघरमध्ये मद्यपींचा सुळसुळाट

खारघरमध्ये मद्यपींचा सुळसुळाट
खुलेआम मद्याचे प्राशन; पालिकेसह पोलिस प्रशासनाचे दुर्लक्ष
खारघर, ता. २२ (बातमीदार) : शैक्षिणक शहर म्‍हणून खारघरची ओळख आहे. त्‍यामुळे शहराला दारूमुक्‍त करावे, यासाठी जनआंदोलन पेटले आहे. दरम्यान, शासनाकडून त्‍याकडे दुर्लक्ष केले जात आहे. शहरात दारूची विक्री होत असून खुलेआम त्‍याचे प्राशनदेखील आता होत असल्याने नाराजी व्‍यक्‍त केली जात आहे. शहरात शिक्षण संकुले असताना विद्यार्थ्यांच्या मनावर याचा गंभीर परिणाम होईल, अशी भावना खारघरवासीयांकडून व्‍यक्‍त केली जात आहे. राज्य उत्पादन शुल्क आणि खारघर वाहतूक पोलिसांनी अशा मद्यपींवर योग्य ती कारवाई करावी, अशी मागणी जोर धरीत आहेत.
खारघरमध्ये आजच्या घडीला सर्वाधिक विविध क्षेत्रांतील महाविद्यालये आहेत. त्‍यामुळे दररोज हजारो विद्यार्थी विविध शहरांतून खारघरमध्ये येतात. त्‍यामुळे शैक्षणिक शहर म्‍हणून ओळख असलेले खारघर शहर दारूमुक्त व्हावे, यासाठी मागील काही वर्षांपासून रहिवासी आंदोलने करीत आहेत. मात्र अद्याप शासनाकडून कोणताही निर्णय घेण्यात आलेला नाही. दरम्यान, काही दिवसांपूर्वी उत्सव चौकाकडून सेंट्रल पार्ककडे जाणाऱ्या रस्त्याच्या डाव्या बाजूला नव्याने सुरू झालेल्या दारूच्या दुकानासमोर मद्यपी निवांत बसून दारू पित असल्याचा व्हिडिओ सोशल मीडियावर व्हायरल होत आहे. विशेष म्हणजे उत्सव चौकाकडून सेंट्रल पार्कमार्गे तळोजाकडे जाणाऱ्या रस्त्यावर वाहनांची वर्दळ असते. तसेच रस्त्याकडेला दारूचे दुकान असल्यामुळे मद्यपी दारू खरेदीसाठी रस्त्यावर वाहने उभी करीत असल्यामुळे वाहतूक कोंडीत भर पडत आहे. तसेच सायन-पनवेल महामार्गावरील कोपरा गावाजवळदेखील मद्यपी खुलेआम दारू प्राशन करीत असताना दिसून येत आहे. त्‍यामुळे राज्य उत्पादन शुल्क विभाग आणि वाहतूक पोलिसांनी अशा मद्यपींवर योग्य ती कारवाई करावी, अशी मागणी खारघरवासीयांकडून केली जात आहे. यासंदर्भात राज्य उत्पादन शुल्क विभागाचे अधिकारी राजू फणसेकर यांच्याशी संपर्क केला असता, व्हिडिओची पाहणी करून योग्य ती कारवाई केली जाईल, असे सांगितले.
......................
सीबीडीवरून उत्सव चौकमार्गे खारघर सेक्टर १२ ते ४० तसेच तळोजा आणि कल्याणकडे जाणाऱ्या मार्गावर वाहनांची वर्दळ असते. या मुख्य रस्त्यावर सुरू झालेल्या वाइन शॉपमधून मद्य खरेदी करणाऱ्यांची गर्दी असते. त्‍यामुळे दारू खरेदी करणाऱ्या नागरिकांकडून रस्‍त्‍यावर गाड्या पार्क केल्या जातात. यामुळे वाहतूक कोंडीत भर पडत असल्याच्या तक्रारींत वाढ होत आहे. वाहतूक विभागाने याकडे लक्ष देण्याची गरज आहे.
- संजय घरत माजी, उपसरपंच, बेलपाडा
.................
खारघर वाहतूक पोलिसांकडून रस्त्यावर उभ्या केल्या जाणाऱ्या वाहनचालकांवर कारवाई केली जात आहे. तसेच मद्यपीने रस्त्यावर वाहने उभी करू नयेत, यासाठी कामगारांची नेमणूक करावी, अशी सूचना वाइन शॉप व्यवस्थापकांना देण्यात आली आहे. सूचनेकडे दुर्लक्ष केल्यास योग्य ती कारवाई केली जाईल.
- तिरुपती काकडे, उपायुक्त, वाहतूक विभाग, नवी मुंबई
....................